285
Ородой Холбоото Уласай Гэгээрэлэй яаман болон Буряад Уласай Засагай газартай хамта Ород гүрэнэй «Болбосорол хүгжөөлгэ» гэһэн программын хэмжээндэ 1,5-һаа 3 наһа хүрэтэр үхибүүдтэ хүүгэдэй хубиин сэсэрлигүүдтэ нэмэлтэ һууринуудые байгуулгада тэдхэмжэ үзүүлхэ тухай хэлсээ баталба. Энээн тухай Буряад Уласай болбосоролой болон эрдэм ухаанай сайдай орлогшо мартын 11-дэ хүүгэдэй хубиин сэсэрлигүүдэй хүтэлбэрилэгшэдтэй зүблөөндэ хэлэһэн байна.
- Уласай хүүгэдэй хубиин сэсэрлигүүдтэ 1156 һууринуудые байгуулхаар түсэблэгдэнэ. Тэдхэмжын хэмжээн 142,6 сая түхэригһөө дээшэ болоно, тэрэнэй 139,7 сая түхэригһөө дээшыень федеральна бюджетһээ һомологдохо, - гэжэ Валерий Поздняков хэлэбэ.
Энэ мүнгөөр хүүгэдэй сэсэрлигүүдтэ хэрэглэгдэхэ эд бараан, хүүгэдые харахада хэрэгтэй (стиральна машинанууд, умывальнигууд, полотенце хатааха хэрэгсэл г.м.), эдеэ хоол шанаха болон эмнэлгын газарта тоног хэрэгсэлнүүд абтаха юм. Энээнһээ гадуур, эрэмдэг бэетэй хүүгэдэй һаадгүй оршон байгуулагдаха ёһотой: дуутай маягууд, мнемосхемэнүүд, хараа муутай үхибүүдтэ мэдээсэлэй-тактильна тэмдэгүүд.
Үхибүүдэй наадаха, хүмүүжэхэ хэрэгтэ һургалгын, нааданай хэрэгсэлнүүд абтаха. Гүрэнэй болон муниципальна сэсэрлигүүдһээ гадна, һургалгын ажал ябуулдаг хубиин болбосоролой эмхинүүд тэдхэмжэдэ хүртэхэ аргатай.
Энэ хэлсээ бэелүүлхэ зорилготой Буряад уласай болбосоролой болон эрдэм ухаанай яаман тэдхэмжэ үзүүлхэ гурим байгуулаа. Мүнөө Буряад Уласай Засагай газарай тогтоолой түсэл эмхи зургаануудта хэлсэгдэнэ.
Буряад уластай үнэмшэлгэтэй хүүгэдэй хубиин 27 сэсэрлиг болон 35 олзын хэрэг эрхилэгшэд хүүгэдые юрэл хараад байдаг, болбосоролой программа бэелүүлдэггүй, энэ һалбарида хүдэлдэг. Эдэ сэсэрлигүүдтэ 4150 үхибүүд ябадаг. 2020 оной мартын 1-нэй мэдээгээр, 8152 үхибүүд хүүгэдэй сэсэрлигүүдтэ ябадаггүй, тэдэнэй 5341-нь – 3-7 наһатай үхибүүд.
