372
Мартын 12-то Ородой Холбоото Уласай Юрэнхылэгшын үүсхэлээр байгуулһан үхибүүдтэй гэр бүлэнүүдые дэмжэхэ арга үргэдхэхэ гэһэн федеральна хуули хүсэндөө оробо.
Хубилалтануудай ашаар, 2020 оной январиин 1-һээ үхибүүтэй болоһон гү, али үргэжэ абаһан бүлэнүүд 466 617 түхэригэй эхын капиталда хүртэхэ аргатай.
2020 ондо хоёрдохи үхибүүтэй болоһон гэр бүлэнүүдтэ эхын капитал 150 мянган түхэригөөр нэмэгдэжэ, 616 617 түхэриг болобо. Энэл мүнгэндэ эхын капиталда хүртөөгүй, гурбадахи (удаадахи) үхибүүтэй болоһон гү, али үргэжэ абаһан гэр бүлэнүүд хүртэхэ юм.
Эхын капиталда үнэмшэлгэ ажалай 15 үдэрэй туршада бэлдэгдэнэ, тэрэ мүнгэеэ юундэ дамжуулхаб гэһэн мэдүүлгэ һарын туршада харагдадаг. Апрелиин тэнһээ Пенсионно жаса үхибүүтэй болоходонь, тэрэ доронь эхын капиталай үнэмэшэлгэ (автоматически) бүтээхэ талаар ажал ябуулна. Үхибүүн тухай мэдээсэл Ородой Пенсионно жасада ЗАГСын дансануудһаа сэхэ ородог болохо. Үнэмшэлгэ тухай мэдээсэл Гүрэнэй туһаламжын порталда гү, али Пенсионно жасын сайтда эжынэйнь дансада дамжуулагдаха юм.
Үхибүүдые үргэжэ абаһан гэр бүлэнүүдтэ үнэмшэлгэ абахын тула мэдүүлгэ бэшэхэ гурим үлэхэ, юундэб гэхэдэ, үхибүү үргэжэ абаһан тухай мэдээсэл түрэлхид лэ харуулха аргатай.
Багсаамжалһан мэдээгээр, Буряад уласта 2020 ондо найман мянганһаа дээшэ түрүүшын гү, али хоёрдохи үхибүүд түрэгдэхэ. Түрүүшын үхибүүтэй болоһон гэр бүлэнүүдтэ эхын капитал түлэхын түлөө Пенсионно жасын Буряадтахи таһагта нэмэлтэ 1,5 миллиард түхэриг хэрэгтэй.
Бүхы асуудалнуудаар Пенсионно жасын Буряадтахи таһагай дистанционно туһаламжын түбтэ 8(3012) 29-14-14 гэһэн утаһаар хандажа болоно.
