230
Мартын 10-да Буряад Уласай Засагай газарай уласай эдэй засагай болон ниигэмэй хүгжэлтын ажал тухай зүблөөндэ Ородой Холбоото Уласай Засагай газарай Түрүүлэгшын орлогшо – Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев Ород гүрэнэй Байгаалиин нөөсэнүүдэй яаман гүрэнэй Юрэнхылэгшын Түнхэнэй дархан газарай хүрэеэлэнһээ хүдөө нютагуудые болон хүдөө ажахын газарнуудые гаргаха тухай даабари дүүргэнэгүй гэжэ тэмдэглээ.
Түнхэнэй дархан газарай хүреэлэнһээ хүдөө нютагуудые гаргаха тухай даабари абтаһан сагһаа хойшо жэлэй туршада Буряад Уласай Засагай газарта Ород гүрэнэй Засагай газарай захирамжа бэлдэхэ талаар ажал ябуулагдана. Алексей Цыденов энэ асуудал шиидхэхэ талаар хэгдэһэн ажал тухай тоосожо, мүнөө байһан федеральна хуулида хубилалта оруулха гэжэ Ородой Холбоото Уласай Засагай газарай Тогтоолой багсаамжалһан түсэл Буряад Уласай Засагай газарта бэлдэгдээ гэжэ хэлэбэ. Түсэлдэ энэ асуудалаар хабаатай бүхы эмхинүүдэй, тэрэ тоодо, Ород гүрэнэй прокуратурын сэгнэлтэ абтанхай, федеральна яаманһаа шиидхэбэри хүлеэгдэнэ.
- Бидэ хүнүүдэй түлөө ажал хэнэбди. Тэндэ хүнүүд ажаһууна. Тиигэбэшье тэдэнэр газаршье абаха, гэр бариха аргагүй, хүүгэдэй сэсэрлиг, һургуули, хангалгын байгууламжа барижа шаданагүйбди. Мүнөөдэрэй зүблөөнэй һүүлээр, энэ асуудал түргөөр шиидхэхэбди гэжэ найданаб. Байгаалиин онсо газаарнууд онсо харууһалагдаха, аршалагдаха ёһотой, гэхэ зуура, хүнүүд хуулиин дутуу дундануудһаа зүдэрхэ ёһогүй. Хүдөө нютагуудые хүрэелэнһээ гаргажа, онсо харууһатай байгаалиин дэбисхэрэй газарай талмай дээшэлүүлжэ, энэ асуудал шиидхэхэ хэрэгтэй. Жэл соо ажал хээт! Юундэ жэлэй туршада юуншье хэгдээгүйб? – гэжэ Юрий Трутнев Ородой Байгаалиин нөөсэнүүдэй яаманай түлөөлэгшэ – сайдай орлогшо Мурад Керимовтэ хандаба.
Юрий Трутнев Засагай газарай Түрүүлэгшэдэ Юрэнхылэгшын даабари дүүргэгдээгүй гэжэ доклад оруулха гэжэ даалгажа, сайдай орлогшоһоо доошо бэшэ хүтэлбэрилэгшэдтэ дисциплинарна хэһээлтэ абаха тухай хэлэбэ. Тэрээнһээ гадуур, асуудал һарын туршада шиидхэхэ гэжэ даалгаа.
1991 ондо Түнхэнэй дархан газарай хүреэлэндэ Түнхэн аймагай бүхы газар оруулагдаа гэжэ һануулнабди. 300 жэлэй саана байгуулагдаһан гушаад нютагууд, хорёод мянган ажаһуугшад хүреэлэнэй бүридэлдэ оруулагдаа. Мүнөө болоходо, хүдөө нютагуудай ажаһуугшад газараа өөрын мэдэлдэ оруулжа шаданагүй, хүнгэлэлтэтэй эрхэтэд газар абажа шаданагүй. Тэрээнһээ гадуур, хүүгэдэй сэсэрлигүүдэй болон һургуулинуудай газарнуудые дансатай болгохо баһал аргагүй.
Буряад Уласай Засагай газарай мэдээсэлэй албанай гэрэл зураг
