​​«Һэргэг» зон һэжэглээ

«Байгал» театрай артистнар мүнөө Ород гүрэнэйнгөө хотонуудаар гастрольдо ябажа байна. Эндэ һаяхана тэдэнэй Красноярск хүрөөд, зошод буудалда байрлахаяа ороходонь, хотын «һэргэг» ажаһуугшад манай зүжэгшэдые хитадууд ерэбэ гэжэ бодоо ха. Тиигэжэ зошод буудалда хүршэ оршодог гэртэ байрлаһан зон сагдаанарта хонходожо мэдүүлээ ха.

- Гомдомоор муухай ушар бидэнэртэй тохёолдобо. Зошод буудалда хүсэд түбхинэжэшье үрдеэдүй байтарнай, сагдаанар ерэжэ, бидэниие шалгаба. Энэ иихэдээ юун боложо байна гээшэб? Шуһа, яһаарнь хүн зониие илгажа байхадаа. Түрэл орондоо байгаад, иигэжэ шоо үзүүлжэ байхада хэндэ һайн байхаб? - гээд, театрай дуушан Жаргал Бадмаев мэдүүлнэ.

Аяар 26 хитадууд ерээд, аймшагтай тахал тараахань гэжэ арад зон хүлгөөд абаа бшуу. Интернет сүлжээндэ энэ мэдээсэл уншаһан зон өөрынгөө элдэб һанамжануудые бэшэнэ. «Халдабарита тахал үбшэнһөө айжа, хүн зоной гомдол бариһые ойлгохоор юм ааб даа. Эдэнэр нэн түрүүн өөрынгөө элүүр энхын түлөө һанаагаа зобоно ха юм», - гэлсэнэ нэгэ зариманиинь. «Зоной шэг шарай хаража илгахадаа, маанадые доромжолбо», - гэжэ нүгөөдэ талань бухиндана. Дэлхэйгээр таража байһан энэ тахал үбшэн хүн зониие ехэтэ хүлгөөһэн зандаа. 

Анна Огороднигой гэрэл зураг