395
Ородой Холбоото Уласай Засагай газарай Түрүүлэгшын орлогшо – Ородой Холбоото Уласай Юрэнхылэгшын Алас Дурнын федеральна тойрогто бүрин эрхэтэ түлөөлэгшэ Юрий Трутнев албанай хэрэгээр Буряад Уласта ябахадаа, Улаан-Үдэдэ Эсэгэ ороноо хамгаалгын Агууехэ дайнай ветеранууд, ара талын хүдэлмэриин болон ажалай ветерануудтай уулзаба.
Буряад Уласай Толгойлогшо Алексей Цыденовтэй хамта тэрэ 11 ветерануудта «1941-1945 оной Эсэгэ ороноо хамгаалгын Агууехэ дайнай 75 жэлэй Илалта» гэһэн ойн баярай медаль барюулаа.
Эгээл аха заха, майн 5-да 101 наһатай болохо, Ефрем Андреевич Ковалевто Ородой Холбоото Уласай Засагай газарай Түрүүлэгшын орлогшо болон Буряад Уласай Толгойлогшо гэртэнь хүрэжэ, амаршалба.
- Ефрем Андреевич, Агууехэ Илалтын 75 жэлэй һайндэр ойртобо. Таниие амаршалнаб. Энэ ойн баярта дашарамдуулан, Владимир Владимирович Путин дурасхаалай медаль байгуулха шиидхэбэри абаһан байна. Мүнөө би танда барюулнаб. Дэлхэйн хамаг һайниие танда хүсэнэб! Гарахаа байһан һайндэрөөр! – гэжэ Юрий Трутнев хэлэбэ.
Уласай зүгһөө Алексей Цыденов дурасхаалай бэлэгүүдые барюулжа, Илалтын һайндэрөөр амаршалба.
- Тэрэ сагта, хаанашье ябахадаа, Эхэ ороноо мартангүй бидэнэй ябаһандал, таанад, бидэнэрые, ветерануудые, мартанагүйт, һайн даа баяр хүргэнэб, - гэжэ Ефрем Андреевич Ковалев тэмдэглэбэ.
Ойн баярай медальнуудые барюулха ёһолол Улаан-Үдэ хотын захиргаанда үргэлжэлөө. Эндэ дайнай арбан ветерануудта медальнууд барюулагдаа.
- Баярай дулаахан үгэнүүдые, дайнай ба ажалай ветеранууд, тогтоон абыт! Танай ашаар, мүнөө эрхэ, сүлөөтэй, хүсэтэй гүрэндэ ажаһуунабди. Дайнай шэрүүн байлдаануудта, ара талын хүдэлмэринүүдтэ, таанар, бидэндэ, үхибүүдтээ, аша зээнэртээ, амгалан байдал үршөөгөөт. Һайнта даа! Доро дохинобди! – гэжэ Алексей Цыденов хэлэбэ.
Юрий Трутнев баярай үгэнүүдээр дайнай ба ажалай ветерануудта хандаһан байна.
Мүнөөдэр, мартын 10-да, «1941-1945 оной Эсэгэ ороноо хамгаалгын Агууехэ дайнай 75 жэлэй Илалта» гэһэн ойн баярай медальнуудаар шагнагдаа:
1. Ковалев Ефрем Андреевич, 05.05.1919 ондо түрэһэн, Эсэгэ ороноо хамгаалгын Агууехэ дайнда хабаадагша, Тарбагатай аймагай Ехэ Куналей нютагта түрэһэн. 1938 ондо шофёрнуудай курс дүүргээд, «Союзсельхозтранс» гэһэн трестын Окиноключевскойн автоколоннодо хүдэлхэеэ эльгээгдэһэн байна. Монголдо болоһон 1939 онуудай байлдаанда «Союзсельхозтранс» трестһээ жолоошод унаануудтаяа татагдажа, Монголой Маймачино газарта буу зэбсэг, эдеэ хоол, тоһо түлишэ хоёр долоон хонгото хүрэхөөр шэрэхыень эльгээгдээ һэн. Тэдэнэй тоодо, Ковалев Е.А. татагдаа. Халхын голой байлдаануудай дүүрэхэдэ, гэртээ бусажаЕфрем Андреевич 1939 оной декабрь һарада Улаан Армида татагдаа. Ефрем Андреевич Ленинград хотын танкова 49-дэхи полкдо эльгээгдэжэ, 1941 ондо Ленингард хамгаалгада хабаадалсажа, баряанда абтажа, тамаа үзөө. 1945 ондо Германида баряанһаа табигдаа. Дайнай һүүлээр Ковалев Е.А. 30-һаа дээшэ жэлдэ Буряадай обкомдо жолоошоноор хүдэлөө. Дайнай ветеран Эсэгэ ороноо хамгаалгын II шатын орденоор болон «За победу над Германией» гэһэн медаляар шагнагдаа.
2. Голощапов Иван Тимофеевич, (09.12.1923 ондо түрэһэн) Эсэгэ ороноо хамгаалгын Агууехэ дайнда хабаадагша. Воронежско можоһоо гарбалтай. Иван Тимофеевич Баруун фронтын Улаан Тугта хоёрдохи Гвардейскэ 26-дахи бригадын бүридэлдэ дайлалдаа. Ржев хото шадар байлдаанда тэрэ шархатаа. Танкова 248-дахи бригадын бүридэлдэ Белоруссиин хилэ шадар добтолгодо хабаадалсаа. 1956 онһоо хойшо Иван Тимофеевич Буряад Уласай Баунтын военкомадай офицерээр эльгээгдэһэн намтартай. Голощапов Иван Тимофеевич Эсэгэ ороноо хамгаалгын I болон II шатын орденуудаар, «За боевые заслуги» болон бусад ойн баярай медальнуудаар шагнагдаһан юм.
3. Суетин Иван Петрович, (10.09.1924 ондо түрэһэн) Эсэгэ ороноо хамгаалгын Агууехэ дайнда хабаадагша. Москва шадар байлдаанда хабаадаһан. Буряад Уласай Хүндэтэ эрхэтэн. «Гэгээрэлэй отличник», «Буряад АССР болон РСФСР-эй габьяата багша» гэһэн нэрэ зэргэтэй. Иван Петрович Эсэгэ ороноо хамгаалгын I болон II шатын орденуудаар, «Знак Почета», «Трудового Красного Знамени» орденуудаар, МНР-эй хоёр медаляар, «Отличник профтехобразования» значогоор шагнагдаһан. Тиихэдэ Буряад Уласай Президиумэй болон РСФСР-эй Верховно Соведэй Президиумай грамотануудаар шагнагданхай.
4. Норбоев Доржи Гармаевич, (10.10.1927 ондо түрэһэн) Эсэгэ ороноо хамгаалгын Агууехэ дайнда хабаадагша. 1944 оной декабрь һарада сэрэгэй албанда татагдаа. 1945 оной август һарада Маньчжури сүлөөлхэ байлдаанай Японтой дайнда хабаадаа. Дайнай ветеран Эсэгэ ороноо хамгаалгын II шатын орденоор болон «За победу над Японией» гэһэн медаляар шагнагданхай.
5. Стромилов Владимир Евсеевич, (10.06.1927 ондо түрэһэн) Эсэгэ ороноо хамгаалгын Агууехэ дайнда хабаадагша. Совет-япон дайнда старший матрос зэргэтэй алба хаажа, радист ябаһан. Тихоокеанска флодой бүридэлдэ Хойто Солонгос сүлөөлэлгэдэ хабаадалсажа, Солонгосой хахад аралай зүүн талада оршодог хото-порт Вонсан хүрэтэр ошоһон. Дайнай ветеран Эсэгэ ороноо хамгаалгын II шатын орденоор, «За победу над Японией» медаляар, «300 лет Российскому флоту» гэһэн ойн баярай медаляар, «За строительство БАМа» гэһэн медаляар шагнагданхай.
6. Гуслякова Маргарита Георгиевна, (25.02.1933 ондо түрэһэн) ара талын хүдэлмэрилэгшэ. Дайнай эхилһэн сагһаа хойшо Маргарита Георгиевна һургуулида һураха үедөө, һургуулиин бригадануудай бүридэлдэ хүдэлһэн. Маргарита Георгиевна уласай хамалганда хосорһон зоной эблэлэй эхи табигшадай нэгэн. 1994 ондо тэрэ Октябрьска аймагай Хамалганда хосорһон хүнүүдэй эблэлэй түрүүлэгшын орлогшоор һунгагдаа. Маргарита Георгиевна «Отличник здравоохранения СССР» гэһэн нэрэ зэргэтэй, «За доблестный труд в Великой Отечественной войне 1941-1945гг.» болон Илалтын һайндэрэй ойн баярай медальнуудаар, гүрэнэй, уласай болон эмхи зургаануудай грамотануудаар шагнанданхай.
7. Ринчинов Балдан-Дамба Эрдынеевич, (10.09.1930 ондо түрэһэн), ара талын хүдэлмэрилэгшэ. 10 наһатайһаа дайнай дүүрэтэр Хори аймагай Ленинэй нэрэмжэтэ колхоздо хүдэлөө. Балдан-Дамба Эрдынеевич «Буряад Уласай хүндэтэ эрхэтэн», «Буряад Уласай габьяата мал үсхэбэрилэгшэ» гэһэн нэрэ зэргэнүүдтэй, Ленинэй нэрэмжэтэ орденоор, Ажалай Улаан Тугта орденуудаар, «1941-1945 онуудта Эсэгэ ороноо хамгаалгын Агууехэ дайнай үедэ эрэлхэг ажалай түлөө» медаляар, болон СССР-эй ВДНХ-гай мүнгэн болон хүрэл медальнуудаар шагнагданхай.
8. Ламожапов Ринчин Очирович, (06.11.1924 ондо түрэһэн) ара талын хүдэлмэрилэгшэ. 1941 онһоо хойшоо 17 наһатайһаа дайнай дүүрэтэр Улаан-Үдын Паровозо-вагонно заводто слесареэр хүдэлөө. 1946 ондо сэрэгэй албанда татагдажа, сэрэгэй-уһанай флотдо эльгээгдэжэ, «старший матрос» гэһэн зэргэтэй. Илалтын ойн баярта дашарамдуулһан медальнуудаар шагнагданхай.
9. Ерженина Галина Ивановна, (28.04.1932 ондо түрэһэн), ара талын хүдэлмэрилэгшэ. Дайнай эхилһэн сагһаа хойшо 3-дахи класста һуража байхаһаа Загарай аймагай совхозуудта һургуулиин бригдануудай бүридэлдэ хүдэлөө. 2006 онһоо хойшо Зүүн Сибириин түмэр харгын Улаан-Үдын таһагай зүблэл хүтэлбэрилнэ. Галина Ивановна «Отличник социалистического соревнования железнодорожного транспорта», эмхи зургаанай олон тоото грамотануудаар, «Ажалай ветеран» гэһэн медаляар шагнагданхай.
10. Скуратов Иван Георгиевич, (10.09.1933 ондо түрэһэн), ара талын хүдэлмэрилэгшэ. Дайнай эхилһэн сагһаа Иван Георгиевич һургуулида һураха үедөө Үбэр Байгалай хизаарай Шэтэ можын колхоздоо адуушанаар, хонишоноор хүдэлөө. «За высокие социалистические показатели» гэһэн засагай газарай грамотаар, эмхи зургаануудай олон тоото грамотануудаар шагнагданхай.
11. Синегрибов Леонид Кириллович, (15.03.1941 ондо түрэһэн) хуулиин наһа хүсөөгүй байхадаа, фашист лагерьнуудта баряанда байһан, ажалай ветеран. Леонид Кириллович дайнай эхилхэһээ урид, Брянска областиин Дятьково хотодо түрэһэн. 1941 оной намар немцүүд түрэл хотыень бүһэлэлтэдэ абаһан байна. 1943 оной сентябрь һарада хүгшэн эжытэеэ поездоор олон эхэнэрнүүд болон үхибүүдээр хамта Германи туугдаа һэн. Леонид Кириллович 2011 онһоо хойшо «Российский Союз бывших несовершеннолетних узников фашистских лагерей» гэһэн бүхэроссиин олониитын эмхи хүтэлбэрилнэ. Буряад Уласай соёлой габьяата хүдэлмэрилэгшэ.
