1081
2020 оной түмэрэй аюултай хаһада бэлэдхэлэй талаар Буряад Уласай Засагай газарта зүблөөн үнгэргэгдэбэ. Хэмжээ ябуулгада Буряад Уласай Засагай газарай Түрүүлэгшын аюулгүй байдалай талаар орлогшо Пётр Мордовской аймагуудай хүтэлбэрилэгшэнэртэ ойн түймэрэй һүжэрхэ асуудал хинажа байхыень уряалба.
Түймэрэй аюултай хаһын эхилһэн сагһаа хойшо ой тайгануудта шалгалтанууд үнгэргэгдэжэ байха. Ойн жасын дэбисхэртэ 109 пост табигдаха, 30,5 модоной зайда шалгаха 427 маршрут, авиа шалгалта үнгэргэхэ 12 маршрут байгуулагдаа.
Буряад Уласай Ойн ажахын агентствын хүтэлбэрилэгшэ Александр Мартыновэй хэлэһээр, Буряад уласай дэбисхэртэ түймэр сараха талаар түсэб 2019 оной ноябрь һарада табигданхай. Һаяын үдэрнүүдтэ Буряад уласай ойн ажахынуудта түймэр сараха техникэ болон хэрэгсэлнүүд шалгагдаха юм.
Тиихэдэ радиостанцинуудта шалгалтанууд үнгэргэгдөө гээд тэмдэглэлтэй. Түймэр сарагшад хоорондо холбоо бариха радиотехникээр хангагдаха. Апрелиин 15 болотор ойн дэбисхэртэ авиа шалгалтануудые үнгэргэхэ талаар хүдэлмэрилэгшэдтэй хэлсээнүүд баталагдаха юм.
2020 оной ойн түймэрэй аюултай хаһын эхилхэдэ, Буряад уласта ойн жасын 2,5 сая гектар талмай хинаха 20 видеокамера хүдэлхэ. Энэнь нёдондонойхидо орходоо, хоёр дахин ехэ.
«Хэнэй мэдэлэй газарта түймэр гарааб гэжэ бэдэрэнгүй, түймэр саранабди. Удаань элирүүлхэбди», - гэжэ Пётр Мордовской онсолбо.
