​​Улаан-Үдын 40-дэхи һургуулиин шэнэ байшанай барилга март һарада эхилхэ

Буряадай ниислэл хото Улаан-Үдын 40-дахи һургуулида 450 һууритай шэнэ байшан баригдажа, байгша оной һүүл багта ашаглалгада тушаагдаха юм. Тэрэнэй барилгада «Болбосорол» гэһэн үндэһэн түсэлэй хэмжээндэ 510 саяһаа дээшэ түхэриг һомологдоо.

Мүнөө барилга эхилхэ талаар бэлэдхэлэй ажал ябуулагдана.

1960 ондо баригдаһан 40-дэхи һургуули 2018 ондо аюултай болонхой гэжэ бүридхэлдэ абтаа һэн. Үнгэрһэн жэлдэ һургуули задалагдажа, һурагшадынь хотын бусад һургуулинуудаар тараагдаһан байна. Тиигэжэ шэнэ һургуули бариха эмхи элирүүлхэ мүрысөөн эмхидхэгдэжэ, тоололгын-түсэлэй данса бэлдэгдээ. Удаань «Стройинком» бүлгэмтэй хэлсээн баталагдаа.

Ородой Холбоото Уласай Юрэнхылэгшэ Владимир Путинай «майн» тогтоолнуудые бэелүүлхэ зорилготой «Болбосорол» гэһэн үндэһэн түсэл байгуулагдаһан юм. Энэ түсэл 2024 он болотор бэелүүлэгдэхэ гэжэ һануулнабди.

Анна ОГОРОДНИГОЙ гэрэл зураг