1264
Һонирхолтой түсэл «РЖД» бүлгэмэй «Федеральная пассажирская компания» бүлгэм «Лернидее Эрлебнисрайзен ГмбХ» (Lernidee Еrlebnisreisen GmbН) компани болон мүнгэ хүрэнгэ оруулха Алас Дурнын агентствэтэй хамта бэелүүлнэ.
Франци, США, Австрали, Голланди, Германи, Великобритани, Швейцари, Австри, Итали, Венгри, Канада болон Япониин 92 аяншалагшад Буряад уласта ажаһуудаг үндэһэ яһатанай ажабайдалтай, соёл уралиг, ёһо заншалнуудтайнь танилсаха юм. Тэдэнэр Тарбагатай тосхоной шэмээшэгүүдтэй, тиихэдэ буряад, ород гэр бүлэнүүдтэ хүрэхэ гэжэ түсэблэгдэнхэй.
«Буряад уластай танилсалга албан ёһоной хэмжээндэ бэшэ, харин һонирхолтойгоор үнгэргэхэ хүсэлтэйбди. Ёһо заншалаа сахижа байһан хүнүүдтэй уулзалга эгээл һонин гээшэ ааб даа. Тиихэдэ гэрнүүдтэ ороод, байдалыень юрэ хараад гарашаха бэшэ, жэшээнь, буряад айлдаа ороходоо, бууза мушхаха. Ородууд Масленицатай танилсуулха. Тиихэдэ заатагүй Ивалгын дасан хүрэжэ, Пандито Хамбо-ламы Даши-Доржо Итигэловтэ мүргэхэбди. Теэд, яагаад алдар суута Байгал далайда хүрэхэгүйбши», - гэжэ «Лернидее Эрлебнисрайзен ГмбХ» компаниин гүйсэдхэхы захирал Нурлан Мукаш хэлэбэ.
Zarengold гэһэн поезд Москваһаа Улаан-Үдэ хүрэтэр февралиин 23-да гараа. Харгыдаа аяншалагшад Екатеринбург, Красноярск, Эрхүү хотонуудта тогтохо юм.
Алас Дурна болон Арктикада аяншалга хүгжөөлгэдэ «Лернидее Эрлебнисрайзен ГмбХ» (Lernidee ЕrlebnisreisenGmbН) компани 1,36 млрд түхэриг оруулха түэсбтэй. Энээн тухай хэлсээн 2020 оной январь һарада баталагдаа һэн.
Алексей Жилинэй гэрэл зураг
