1315
«Байгалай загаһашалалга» эмхидхэгшэд нүүдэл суглаа Байгалай эрьедэ үнгэргэбэ. Тус хэмжээ ябуулгада «Титан» компаниин эмхидхэлэй хороон, Байгал шадарай аймагай хүтэлбэрилэгшэ, тиихэдэ загаһа баригшадай мүрысөөнэй эмхидхэн байгуулагша Вадим Бредний хабаадаа.
- Суглаанай үедэ гушанһаа дээшэ асуудалаар зүбшэн хэлсээбди. «Байгалай загаһашалалга» хэдыдэхи жэлээ үнгэргэгдэнэ, тиимэһээ хэн юунэй түлөө харюусанаб гэжэ булта мэдэнэ. Загаһа барилгаар урилдаан үндэр хэмжээндэ үнгэргэгдэхэ ёһотой, - гэжэ Вадим Бредний хэлэбэ.
Нүүдэл суглаанай үедэ хангалгын байгууламжын талаар асуудалнуудһаа гадуур мүрысөөндэ хабаадагшадые хонохо газараар хангаха тухай хэлсээ. Байгша оной «Байгалай загаһашалалгада» 300-аад команданууд хабаадахаар хүлеэгдэнэ. Тиихэдэ Буряадай түлөөлэгшэдһээ гадна, Эрхүү, Братск, Красноярск, Владивосток хотонуудһаа мэдүүлгэнүүд оронхой. Гэхэтэй хамта, «Эдир загаһашан - 2020» гэһэн хоёр часай тулалдаан мүнөө жэл эмхидхэгдэхэ. Энэ хэмжээ ябуулгада 14 наһа хүрэтэр үхибүүд хабаадаха юм.
Байгал шадарай аймагай Турка һуурин шадар «Байкальская Гавань» гэһэн газарта байгша оной мартын 27-28-най үдэрнүүдтэ «Байгалай загаһашалалга» эмхидхэгдэхэ гэжэ һануулнабди. Хэмжээ ябуулга тухай тодорхой мэдээсэл «Байгалай загаһашалалгын» сайтдэ абаха аргатайт.
Загаһа бариха мүрысөөнэй айлшаар Ородой Холбоото Уласай габьяата артист Дмитрий Дюжев бууха юм.
Байгша оной мүрысөөнэй шангай жаса баян. Түрүү һуури эзэлэгшэдтэй аэроглиссер «Север Фантом 650» барюулагдаха. Хоёрдохи һуурида - YAMAHA гэһэн снегоход, гурбадахи һуури эзэлэгшэдтэ лодочный мотор барюулагдаха юм. Тиихэдэ арбадахи һуури хүрэтэр эзэлэгшэд шангууд үгтэхэ, урмашуулгыншье шангууд байха.
Буряад Уласай хүдөө ажахын болн эдеэ хоолой яаманай дурадхаһан гэрэл зураг
