​​Архигүй аймаг

Байгша һарын 20-до Монголой Баянхонгор аймагай бүхы 20 сомондонь “Архигүй Баянхонгор” гэһэн хэмжээн албан ёһоор соносхогдобо.

Элүүр энхын бүхэдэлхэйн эмхи тон ехээр архи уудаг Ази түбиин улас оронуудые элирүүлхэдээ, Монгол гүрэниие дүрбэдэхи һуурида гаргаһан байха юм. Жэл соо нэгэ хүн 7,8 литр архи, пиво хэрэглэнэ гэһэн тоо баримта хэдэн жэлэй урда соносхогдоо һэн. Хэмһээ хэтэртэрээ архи ууһанһаа боложо, наһанһаашье нүгшэхэ ушарнууд Монголдо олоор бүридхэгдэнэ. Тиигэжэ 2019 ондо ганса Баянхонгор аймагта 93 хүн архиин хоронһоо амияа алдаа. Энэ шалтагаанаар тус аймагай ажаһуугшад архида эсэргүүсэхэ үргэн дэлисэтэй арга хэмжээ үүсхэбэ.

- Алибаа найр наадануудые, һайндэрнүүдые, Сагаан һараяашье архигүйгөөр үнгэргэдэг болоё. “40 хүрөөд лэ, дүнгэжэ амсаха” гэһэн урданайнгаа заншал һэргээн сахия, - гэхэ мэтын уряануудые аймагай ажаһуугшад “Архигүй Баянхонгор” гэһэн арга хэмжээнэй нээлтын үеэр соносхобо.

Аймагай Баганат талмай дээрэ болоһон үргэн дэлисэтэй тус үйлэ хэрэгтэ гүрэнэй эмхи зургаануудай мэргэжэлтэд, олониитын байгууламжануудай гэшүүд, юрын арад зон – дүн хамтадаа 300 гаран хүн хабаадаһан байна. Эмхи зургаан бүхэн архиһаа арсаха талаар, тэрэнэй хорото нүлөө тухай багахан наада харуулаа.

Тиигэжэ аймагай сагдаанар Баянхонгор сомоной хоёр ресторанда нэгэ һүни соо задалагдаһан пивын 380 шэл суглуулжа, “хүшөө” бодхоогоо.