​​Дуушан түрэһэн урмандаа

«Новая звезда» гэһэн дуушадай уласай урилдаан энэ жэлэй эхиндэ боложо үнгэрөө. Заншалта ёһоороо тэрээндэ Эхэ ороноймнай бүхы можо нютагуудай дуушад хабаададаг юм.

Шүүгшэдэй түрүүлэгшэ, мэдээжэ хүгжэм зохёогшо Максим Дунаевскиин хэлэһээр, илагшые элирүүлхэнь тон орёо байгаа. Юундэб гэхэдэ, хабаадагша бүхэн һайн бэлэдхэлтэй ерээ.

Харин харагшад өөһэдөө Интернет сүлжээндэ дуугаа үгэжэ, эрхим дуушаниие шэлэхэ аргатай байгаа гээд хэлэлтэй. Иимэ аргаар хальмаг арадай эрхим түлөөлэгшэ Лиджи Горяев түрүүлбэ. Шэлэн абалгын шатада тэрэ хальмаг арадай дуу хөөмэйн аргаар гүйсэдхөө. Харин хахад финалда ороходоо, “Разбежаться и упасть” гэжэ нэрэтэй уянгата дуу хангюурдаа. Лиджи Горяев мэргэжэлтэ дуушан юм. Тэрэ нютагтаа Элистагай хүгжэмэй училищи, Хальмагай хэлэ бэшэгэй дээдэ һургуули дүүргэһэн байна. Бэлигтэй дуушан 1 сая түхэриг мүнгэн шанда хүртөө.

Энэ урилдаанда Буряадтаа мэдээжэ дуушад Тимур Болотов Сэсэг Аюшеева хоёр «Урагшаа» бүлгэмэй бүридэлдэ хабаадаа һэн гээд һануулая.

Буряад Уласай соёлой яаманай мэдээсэлэй албанай гэрэл зураг