​​Улаан-Үдын түхэл шарай

Эрхим хүндэтэ уншагшаднай, энэ жэлдэ һүүлшынхиеэ мэндэеэ хүргэнэб! Урдахи дугаарнуудтаа дэлгээһэн үнөөхил хасуурияа та олондоо дурадхахадаа, дэлхэйн эрдэни зэндэмэни Байгалай мүльһөөр дархалаатайень шэлэбэб. Иигэжэ Шэнэ жэлэй хүрэжэ ерэхэеэ байһыень һануулаад, социальна холбоон соо болоһон адаглалтануудаа тэмдэглэхэмни.

Агуу маршалда – хүрэл хүшөө

Улаан-Үдэдэ Танкын хүшөөһөө холо бэшэ оршодог буудалай дэргэдэ Константин Рокоссовскиидо зорюулһан хүшөө бодхоогдоо. Энэ уран барималые Санкт-Петербургда ажаһуудаг Буряадһаа гарбалтай скульптор Вячеслав Бухаевай хэбээр Матвей Макушкин гараараа урлаһан байна. Хэбыень зурахын тулада, Вячеслав Бухаев шэнжэлгын ехэ хүдэлмэри хээ. Илангаяа өөрынь эсэгэ Константин Рокоссовскиин хүтэлбэри доро морин сэрэгтэ алба хааһан байжа, гэр бүлын архивһаа гэрэл зурагуудые уудалаа гээд, нюур хуудаһандаа Буддын шажанай заншалта Сангхын Хэблэлэй албаниие хүтэлдэг Алла Намсараева бэшэбэ. Агуу дайнай алдар суута маршалай Буряадтай нягта холбоотой (наһанайнь нүхэр Хяагтаһаа гарбалтай) ушарһаа бэшэ, мүн хардалганда орожо, шорондо һуухадаа, нэгэшье хүниие заажа тушаагаагүй юм. Тэрээнһээнь боложо, Хамба лама суута сэрэгшэниие ехэтэ хүндэлдэг байна гээд, Алла Намсараева мэдүүлбэ.

Энэ хүшөө хүрэлөөр хэгдээ­тэйень үнэншэхөөр бэшэ гэжэ һэжэглэһэнээ социальна холбоон соо заримашуул бэшэбэ. “Хүрэлөөр хэгдэһэн хүшөө ногообтор үнгэтэй байдаг, харин Улаан-Үдын Ленинэй толгой, Агуу сэрэгшэндэ зорюулһан энэшье хүшөө цементээр урлаһандал боро үнгэтэй”, - гэбэ “Буряад үнэнэй” ветеран Николай Бадмаринчинов. Гэбэшье энэ хүшөө Улаан-Үдын түүхэтэ газарые шэмэглээ гэхэдэ болохо. Аяншадта харуулха, Бу­ряадайнгаа түүхээр омогорхохо үшөө нэгэ шалтаг бии болоо ха юм.

Буряадай ниислэлдэ буугаад...

Теэдшье дэлхэйн олон аяншадые аятайгаар хүлеэн абаха арга боломжо Улаан-Үдэдэ үшөөл зохёогдоогүй гээд, сэтгүүлшэн Дора Хамаганова һаяхана зарга бариба. Яхадһаа Аршаанда амархаяа ерэһэн нэгэ танил нүхэрынь Түмэр харгын вокзалда жорлон бэдэржэ зобоо ха. Ори ганса туаледынь хаагдашанхай. Иимэ байдалда анхаралаа табихыень аяншалгын сайд Мария Бадмацыреновада хандаба. Ерэхэ жэлдэ тэндэ туалет нээлгэн болохогүй юм бэзэ? Юундэб гэхэдэ, һаяхана социальна холбоон соо Антон Беляковой нэгэ гайхалтай мэдээсэл ябаа: Новосибирскдэ һунгамалнуудай хабаадалгатайгаар жорлон нээлгын ёһолол үнгэрөө. Тэрэниие барихын тулада, 4,5 сая түхэриг гаргашалагдаа.

Түмэр замай буудал мүнөө дээрээ hэльбэн шэнэлэгдэһээр. Ехэ заһабариин удаа Дора Хамагановагай гуйлта хараада абтагдаа гү гэжэ эли болохол даа.

facebook.com сүлжээнһээ гэрэл зурагууд абтаба