​​Жабар Үбгэниие хүлеэһээр гү?

Шэнэ жэл угтуулан, мүнөө үеын үхибүүд Жабан Үбгэндэ этигэдэг гү гэжэ асуулта үнгэргөөбди.

Булад, 10-тай, Улаан-Үдэ хотын 3-дахи гимназиин 4-дэхи ангиин һурагша:

- Үбгэн Мороз үгы гэжэ 6-тай байхадаа мэдээ һэм. Ехэл гайхааб. Урда тээнь хасуури доро жэл бүри бэшэг бэшээд орхидог байгааб. Һүниндөө үүдэеэ шэбхэдээд унтахадамнай, Үбгэн Мороз ерээд, бэшэгыем яагаад абахаб гэжэ һанаата боложо эхилээ һэм. Нэгэтэ тэрэ бэшэгыемни абын абахыень харажархёоб. Энэ бэшэгыемни Үбгэн Морозто та абаашана гүт? Хэн абанаб? Яагаад? Эдэ олон асуудалнуудые табижа дайладаг болобоб. «Томо болоо хадашни үнэнииень хэлэе»,- гээд эжы абамни хөөрэжэ үгөө. Одоо сэдьхэлни муудаад абаа һэн. Ямар ехээр үнэншэдэг байгаа гээшэбиб. Үбгэн Морозой орондо гэртэхимни намда бэлэг абана гэжэ ойлгобошье, мүнөө болотороо хасуури дороо бэшэг орхидог зандааб. Бэшээгүй һаамни, эжы абамни асуужа һаладаггүй. Мүнөө жэл “Лего” бэлэг абахаяа һананаб. Шэнэ жэлээр!

Ардан Цыренов, 8-тай:

- Би мүнөө буряад хэлэ шудалжа эхилэнхэйб. Үбгэн Мороз хадаа минии аба гэжэ ойлгонхойб. Нёдондо телефон бэлэг эрижэ бэшэг бэшээд, хасуури дороо табяа һэм. Абамни абажа үгөө һэн. Мүнөө жэл “Айфон” эрижэ бэшээб. Жабар үбгэн бии һаань, иимэ бэлэгүүдые эрихэгүй һэм. Зоригто дүүмни обоо хүбөө саахар, конфетэ, амтатай эдеэнүүдые Үбгэн Мороздо захина. Үшөөл үнэншэнэ ха юм. Шэнэ жэлэй һайндэрнүүдтэ бүхы бүлөөрөө каток ошожо, һолжорхо һанаатайбди.

Данзан, 4-тэй:

- Үбгэн Морозһоо би конструктор- мозаика эрижэ бэшэг бэшүүлээб. Булад абгамни намда “Пожарный” гэһэн конструктор Шэнэ жэлээр гээд бэлэглээ. Намда ехэтэ һайшаагдана, би түймэр сарагша болохоёо һанадагби. Юундэб гэхэдэ, минии аба пожарник ха юм. Би гэр бүлэдөө ехэ дуратайб.

Алдар, 10-тай:

- Жэл бүри гэртээ Шэнэ жэл угтаха дуратайб. Минии һанахада, Үбгэн Мороз биил даа, ондоо яахаб, үльгэртэ юртэмсэ бшуу. Зүгөөр бэлэгүүдые гэртэхимни абадаг гэжэ үнинэй ойлгонхойб. Бүхы зондо Шэнэ жэлдэ жаргал, энхэ элүүрые хүсэнэб!

Буянто, 11 наһатай, 33-дахи гимназиин һурагша:

- Шэнэ жэлэй һайндэр нам­да бүхы ондоо һайндэрнүүдһээ эгээл дүтөөр һанагдадаг. Түрүүшын саһанай орожо эхилхэдэ, Шэнэ жэлые хүлеэжэ эхилдэгби. Юун­дэб гэхэдэ, Шэнэ жэлэй һайндэрэй үдэрнүүдтэ намайе тойроод байһан зон бултадаа хүхюутэй байдаг. Бэлэг абахадаа, одоол жаргалтай байдаг­би. Мүнөө Үбгэн Мороз бии гэжэ үнэншэхэеэ болинхойб. Дүрбэтэй болотороо, үнэхөөрөө бии гэжэ һанадаг һэм. Хэдэн үдэр зураг зура­жа зохёогоод, гэртэхинээрээ бэшэг бэшүүлдэг һэм. Гэнтэ минии бэшэг абажа үрдихэгүй гэжэ айгаад, үдэр бүхэндэ бэшүүлдэг байгааб. Табатай болоходоо, бодолгото боложо эхи­лээб. Яагаад, хайшан гээд бүхы дэл­хэйн хүүгэдтэ бэлэг Үбгэн Мороз ган­саараа асаржа үрдинэ гээшэб? Тии­гээд лэ томошуулһаа элдэб асуудал һуража, хашартай болгоодог болооб. Тиигээд бүдүүн зоной хөөрэлдэхые һэмээхэн шагнажа эхилээб. Намһаа залхуурһан абамни Үбгэн Мороз үгы гэжэ өөрөө яагаад ойлгоһоноо хөөрөө. Хүдөөгэй хүүгэдэй багахан сэсэрлигтэ гоё ёлко боложо, 5-тай­хан абамни шүлэг сээжэлдээд, Үбгэн Мороздо дүтэлөөд хөөрэбэ. Тэрэнь тонгойгоод, саахар бэлэг тулам сооһоо гаргажа байтарнь, һэмээхэн һахалыень эльбэхэм гээд, нюурай багыень хүдэлгэжэрхихэдэнь, Үбгэн Морозой орондо өөрынь аба, минии үбгэн аба байжа байгаа. Тиигэжэ бултадаа энеэлдээ юм ха. Мүнөөшье болотороо бидэ тэрэниие һанажа энеэлдэдэгбди.

Бага байхадаа, би элдэб машина бэлэг эридэг һэм, мүнөө би ро­бототехникын кружогто ябадагби. Тиимэһээ мүнөө үеын оньһото наа- дануудта ехэ дуратайб.

Цырена, 14-тэй:

- Хүн бүхэнэй ажабайдалда заатагүй өөрын Үбгэн Мороз байдаг. Минии Үбгэн Мороз хадаа хүгшэн абамни Чингис Цыбандоржиевич гээшэ. Би багадаа ехэнхи сагаа үбгэн абындаа үнгэргэдэг һэм. Үбгэн Мороздо бэшэг эльгээхэдээ, гэртээ ёлко дороо нюудаггүй, харин хорёо соо саһан соо буладаг байгааб. Үбгэн абатаяа гараад, би тэрээнһээ тэрьелжэ ябаад, саһан хүнгэрэг соо буладаг бэлэйб. Тэрэ бэшэгыемни Үбгэн Мороз абаад лэ, һанаһан хүсэлыемни бэелүүлдэг, гоё һайхан нааданхай бэлэгүүдые абадаг һэн. 6-тай боложо эхилхэдээ, шэдитэ үльгэртэ үнэншэхэеэ болижо байбашье, саһан соо булаад, үбгэн абынгаа хойноһоо адаглабаб. Тэрэмни ошоод лэ, бэшэгыемни олоод абажархёо. Одоо тиихэдээ балшыса баригдаа һэн. Мүнөө болотороо, ёлко дороо бэшэг бэшэдэг заншалаа алдаагүйбди. Мэдэнэб, эжы, абамни, хүгшэн эжы, абамни бэлэг намда бэлдэдэг, теэд иимэ заншалтайбди. Шэнэ жэлээр хүгшэн эжы, абаяа болон бүхы арад зониие хани халуунаар амаршалнаб!

Дара, Тэмүлэн, Наран гурбан:

- Бидэ гурбан эгэшэ дүүнэрбди. Эжынгээ ажалайнь Шэнэ жэлэй нааданда ошоод байхадаа, энэ гэрэл зураг буулгаабди. Шэнэ жэлые хүлеэн угтадагбди. Үбгэн Мороз бидэндэ гоё нааданхай, хүүхэлдэйнүүдые бэлэглэдэг. Мүнөө гоё зурагтай ном захяабди. Үбгэн Морозые хэншье хаража шададаггүй. Теэд тэрэ сүлөөгүй ха юм. Түргэн бушуу бэлэгүүдые тараадаг. Шэнэ жэлдэ заатагүй шэдитэ үйлэ бүтэдэг.