1329
Үнгэрэгшэ долоондо Улаан-Үдын сэсэрлигэй хүүгэдэй дунда монгол туургатанай дээжэ болохо шагай наадаар Уласай хэмжээнэй урилдаан анха удаа боложо үнгэрөө.
Эндэ дүн хамтадаа 150 гаран хабаадагшад суглараа. 5-6 наһанай хүүгэдэй шагай шэдэжэ, мори урилдаа, няһалалга наадажа байхыень харахада ехэл зохид, нюдэндэ урин байгаа.
Жэнхэни буряад арадайнгаа соёл урлалда, арадтаа хабаатай урилдаануудта хүүгэдээрээ оролсоод лэ байдагбди. Иимэ нааданай болоһондонь, тон баяртай байнабди, - гээд, “Тохорюухан” гэһэн сэсэрлигэй буряад хэлэнэй багша Дэжэд Матвеева тэмдэглэнэ.
Үндэһэн буряад наадануудые дэлгэрүүлэгшэ Алексей Гыргенов энэ хэмжээ эмхидхэһэн байна. Тэрэнэй тэмдэглэһээр, аяар холын Ахын, захын Захааминай, Хэжэнгын, Яруунын түлөөлэгшэд холые холо гэнгүй хүрэжэ ерээ.
- Анха түрүүшынхиеэ үнгэргэгдэжэ байһан энэ урилдаан дутуу дундануудтайшье байжа болоо, тэдэнииень саашадаа хараадаа абахабди, - гэжэ наада эмхидхэгшэ найдуулба.
Хэдыхэн арбаад жэлэй саада тээ малша арадай хүүгэд үбэлэй һүниин утаханда аба эжытэеэ малайнгаа арһа шала дээгүүрээ дэбдеэд, алтан зуухынгаа дэргэдэ үнөөхил малайнгаа яһан шагайгаар наадажа сэнгэдэг бэлэй. Мүнөө сагта нааданхайн элбэгтэ, бүри сахим нааданай дэлгэрһэн үедэ урданаймнай заншалта наадануудай һэргэжэ байхадань урматайл даа.
Булат БАДМАЕВАЙ гэрэл зураг
Автор: Булат БАДМАЕВ
