806
Үнгэрһэн гарагай дүрбэндэ Буряадай Толгойлогшо Алексей Цыденов декабриин 31-эй үдэрые – вторнигые амаралтын болгоод, орондонь декабриин 28-ай үдэрые – субботые ажалай үдэр болгохо тухай зарлигай түлэб сүлжээ холбоондо табижа, хүн зониие һанамжануудаараа хубаалдахыень уряалһан байна. Харин үглөөдэрынь энэ дурадхалаа шиидхэбэри болгожо тунхаглаа.
Толгойлогшын пресс-секретарь Алексей Фишевэй тэмдэглэһээр, энэ шиидхэбэри Буряад Уласай гүрэнэй эмхи зургаануудай болон эмхинүүдэй хүдэлмэрилэгшэдтэ хабаатай. Харин федеральна засагай зургаануудта болон хубиин эмхинүүдтэ иимэл хэмжээ абахыень зууршалагдаа.
Тиин үмсын хүүгэдэй сэсэрлигүүдэй субботодо, декабриин 28-да, хүдэлхэ хэрэгтэй байһан тухайнь дурадхал хараада абтаһан байна. Буряадай Болбосоролой болон эрдэм ухаанай яаман тус асуудал шиидхэхэ юм. Эндэ үшөө дахин дабтан һануулая. Имагтал Буряадай гүрэнэй засагай зургаануудай болон уласай мэдэлэй эмхинүүдэй хүдэлмэрилэгшэд декабриин 28-да хүдэлөөд, хуушан жэлэй һүүлшын үдэртэ амарха болобо. Харин федеральна засагай зургаануудта болон үмсын эмхинүүдтэ гансал зууршалагдаа. Тиибэ яабашье Буряадай Толгойлогшо Алексей Цыденов: “Олонхинь зууршалга зүбшөөхэ байха гэжэ һананаб”, - гэжэ тэмдэглээ.
