​​Улаан-Үдэ шадарай Тулунжада эмнэлгын эмхи нээгдэбэ

Буряад Уласай ниислэл хотын шадарай Тулунжа һууринда эмнэлгын эмхи нээгдэбэ. Тэрэнэй барилгада Алас Дурнын тойрогой тэдхэмжын хэмжээндэ 31 сая түхэриг дамжуулагдаа.

Тулунжада таба мянганһа дээшэ хүн ажаһуудаг. Тиихэдэ һүүлэй гурбан жэлэй тоо баримтаар, жэл бүри ажайһуугшадай тоо 150 хүнөөр олошорно. Энээнһээ урид байһан эмнэлгын түрүүшын туһа хүргэдэг эмхи санитарна эрилтэнүүдтэ таарадаггүй һэн.

Байгша оной июль һарада мүнгэн һомологдожо, 457,7 м² талмайтай, хоёр дабхартай байшан баригдаа. Буряад Уласай бюджетһээ 5,3 сая түхэриг һомологдожо, эмнэлгын хэрэгсэл, эд бараан худалдан абтаа.

Буряад Уласай Толгойлогшо Алексей Цыдено Тулунжын ажаһуугшадые амаршалаа:

- Ажаһуугшад эмшэдтэ хандахаяа хотын түб гарадаг байгаа. Мүнөө холо ошонгүй, эмнэлгын туһа абаха аргатай болобот. Ородой Холбоото Уласай Юрэнхылэгшэ Владимир Путин элүүрые хамгаалгын һалбарида онсо анхарал хандуулна. Байгша ондо Алас Дурнын тэдхэмжын хэмжээндэ энэ һалбарида 15 миллиардһаа дээшэ түхэриг Буряад уласта һомологдоо. Гараха жэлдэ 34 ФАП баригдаха.

Буряад Уласай элүүрые хамгаалгын яаманай мэдээсэлэй албанай гэрэл зураг