​​Бахархалай үдэр

Ноябриин 27-до Чингис хаанай түрэһөөр 857 жэлэй ойн баяр тэмдэглэгдэбэ. 2012 оной январиин 9-дэ Монголой Юрэнхылэгшын гаргаһан зарлигаар бэлигэй тоололоор үбэлэй эхин һарын шэнын 1 Монгол бахархалай үдэр гээд тунхаглагдаһан. Тэрэ гэһээр жэл бүри түрын түшэмэд, Монгол Уласай Ехэ Хуралай болон Засагай газарай гэшүүд Улаан-Баатар хотын түб талмай дээрэхи Чингис хаанай хүшөөдэ хүндэдхэл үзүүлдэг юм.

Энэ удаа Монголой Юрэнхылэгшэ Х.Баттулга, Ехэ Хуралай дарга Г.Занданшатар, юрэнхы сайд У.Хүрэлсүх, мүн байгша ондо түрын дээдэ шагнал, түрүү зэргын “Чингис хаан” одондо хүртэгшэ, “The Hu” рок- хамталигай продюсер Б.Дашдондог гэгшэдһээ гадна хэдэн мянгаад юрын хүнүүд агууехэ хаанайнгаа хүшөөдэ ерэжэ, хүндэ ямба үзүүлээ.

- Эзэн Богдо Чингис хаанай мүндэлһэн үдэр болбол монгол туургатанда асари ехэ удха шанартай, бахархал, омогорхолоо элирхэйлдэг баяр юм. Үсөөхэн монголшуудаа дахуулжа, дэлхэйн түүхэ тодорхойлхо зэргэдэ хүргэһэн агууехэ ударидагша Чингис хааниие үеһөө үедэ, уласһаа уласта, удамһаа удамда үндэһэнэйнгөө үзэл бодолой орьёл болгон, бишэрэн, һүзэглэн ябаха ёһотойбди, - гэжэ Х.Баттулга амаршалгын үгэ соогоо онсолбо.

Монгол бахархалай үдэртэ, мүн Бүгэдэ Найрамдаха Монгол Уласай байгуулагдаһанай 95 жэлэй ойдо зорюулагдаһан бүхэ барилдаан эмхидхэгдэжэ, 128 түрүү бүхэшүүл шадал шандааһаяа шалгаа, уран мэхэеэ урилдуулаа. Монгол бахархалай үдэр хүршэ гүрэнэймнай арад зон амаржа, бэе бэеэ амаршалан һайндэрлэдэг юм.

- Һалхяар унаа хэжэ, һаадагаар нүхэр хэжэ, дэлхэйе эзэмдэһэн Эзэн хаанайнгаа мүндэлһэн үдэрые Сагаан һараһаа дутуугүй ехэ баяр гэжэ тоолохо байнаб. Үглөөгүүр бодомсоороо, орон хангайдаа сэржэм үргөөд, сайгаа ууһанайнгаа удаа эжы абадаа ошожо һайндэрлээбди. Энэ үдэр арад зоной шарай гэрэлээр дүүрэн, булта баяртайнууд ябанал даа, - гэжэ Монгол бахархалай үдэр яажа тэмдэглэһэнээ Б.Пүрэвжав хөөрэнэ.

Гэхэ зуура Чингис хаанай түрэһэн үдэрые гансал Монголдо ажаһуугшад бэшэ, дэлхэйн алишье буланда түбхинэһэн эшэгы туургатан тэмдэглэхэ ёһотой гэжэ һанагдана. Эзэн хаанайнгаа нэрэ эрхимлэн хүндэлдэг хүнүүд эдэбхи гаргажа, ерэхэ жэлдэ үбэлэй эхин һарын шэнын 1-дэ Буряад орондоо һайндэрэй арга хэмжээ үнгэргэхэ бэзэ.

МОНЦАМЭ агентствын гэрэл зураг