​​Бүгэдэндэ мэдээжэ Бутидмаа

Тэмээтэеэ энеэбхилэн зогсоһон зохидхон буряад басаганай гэрэл зураг бүхэдэлхэйн зондо ехэтэ һайшаагдаа һэн. Бултанай дура татаһан энэ басаган мүнөө 21-тэй болобо.

Энэ гэрэл зурагай анхан хитад “Women of China” сэтгүүлэй гадар нюурта толилогдоходо, бүгэдэ зон анхаралаа хандуулаа. Илангаяа монгол туургата арадууд ехэтэ һонирхожо, олон тоото һайн һайхан һанамжануудаа сүлжээ холбоондо толилоо һэн. Тиихэдээ “хүн бүхэнэй дура татама, хүн бүгэдэдэ аза жаргал заяаһан эгээл зохид һайхан дангина” гэжэ энэ гэрэл зурагые магтан, үндэр дээрэ үргөө юм.

Бүри анха түрүүн, 2003 ондо гэрэл зураг буулгагша Хан Ченли Үбэр Монголоор аяншалжа ябахадаа, 5-тайхан Бутидмаае сэдьхэлдээ дүтөөр хаража, ханамжатайгаар дүрыень буулгаа һэн. Хэды жэл болоод, һанаанһаань гараагүй илдам басагые дахин хараха, тиимэл урихан зандаа байгаа һаань, үшөө дахин дүрыень буулгаха һанаатайгаар Хан Ченли һөөргөө бусаа.

Арба гаран жэл үнгэрөөшье һаань, Бутидмаа тэрэл урихан миһэрэлтэеэ, үшөөшье сэбэр гоё болошонхой байгаа! Урма баяраар халиһан Хан Ченли 16-тай болошоһон Бутидмаае түрэлхидтэйнь, тэмээтэйнь бүри дуратайгаар гэрэл зурагтаа буулгаа.

Һонирхомоор ушар гэхэдэ, энэ гэрэл зураг “Маша и медведь из Узбекистана” гэжэ нэрлэгдээд, сүүлжээ холбоое хэрэглэдэг зоной дунда ехэ гэгшын арсалдаата зугаа хүүр гаргаһан юм гэжэ тэмдэглэе. 

yehe.asia сайтһаа гэрэл зураг