1052
Алас Дурнын тойрогой тэдхэмжын хэмжээндэ абтаһан 71-911М түхэлэй «Львёнок» гэһэн трамвайнууд Буряадай ниислэл хото хүрэжэ ерэбэ.
Октябриин һүүл багта энэ түхэлэй гурбан трамвай Улаан-Үдын харгыда ябажа эхилээ, удаань хойно хойноһоо хэлэгдэһэн болзортоо бэшэ трамвайнууд хүрэжэ ерэбэ. Үнгэрэгшэ жэлэй хабар Ородой Холбоото Уласай Зүүн зүг хүгжөөлгын яаманай сайд Александр Козлов хотын захиргаанда трамвай абаха үнэмшэлгэ барюулаа гэжэ һануулнабди.
Буряад Уласай ниислэлэй трамвайн парк набтар шалатай шэнэ трамвайтай болоо. Тус трамвай болбол набтар шалатай, гэхэтэй хамта, вагон гар утаһанай USB-сэнэглэгшэтэй. Тэрэшэлэн энэ шэнэ тээбэри жолоошондошье зохид – трамвайн кабина соо уужам һаруул ба шууягүй.
- Трамвайда интерактивна хүтэлбэритэй, харгын хараха газаа талаһаа видео хиналтатай, жолоошоной ажалай һууриин аюлгүйн хамгаалалтатай, жолоошондо туһа хүргэхэ тоногтой, - гэжэ эдэ вагонуудые үйлэдбэрилдэг «ПК Транспортные системы» компаниин захирал Борис Боровой нэмэжэ хэлэнэ.
Буряад Уласай Тээбэриин яаманай тэмдэглэһэнэй ёһоор, шэнэ вагонуудые худалдан абалга уласай эдэй засагай хүгжэлтын хүгжөөхэ түбүүдэй түсэбэй хэмжээ ябуулгануудай нэгэ хубинь болоно. Тиихэдэ Алас Дурнын тэдхэмжын хэмжээндэ 498 сая гаран түхэриг һомологдоо. Гэхэтэй хамта, 2021 ондо трамвайн харгы заһабарилга түсэблэгдэнхэй.
Анна Огороднигой гэрэл зураг
