​​Холын хотоһоо Хохотуй хүрэтэр

Амар сайн, хүндэтэ уншагшад! Тон эдэбхитэйгээр соёлой һалбарида хүдэлэгшэд социальна холбоон соо һуудаг гэжэ адаглахаар байдаг, илангаяа Буряад Уласай Соёлой сайд Соёлма Дагаева үргэлжэ гэрэл зурагуудые олоной үзэмжэдэ дэлгээжэл байдаг онсотой. Албанай хэрэгээр Санкт-Петербург зорижо, хэдэн һонирхолтой постнуудые тунхаглаа.

“Ая гангын” урилгаар

“Россиин Соёлой яаманай Координационно зүблэлдэ болон соёлой хуралдаанда хабаадахаяа Санкт-Петербург ерээб. «Ая ганга» эблэлэй урилгаар «Байгал» театрай дуушад болон оркестр, тэрэ тоодо бэлиг түгэлдэр Баттулга Галмандах, олоной дура эзэлһэн Бадма-Ханда концерт-наада харуулба. Нютагһаа холо буряад дуунууд ондоогоор соностоно”, - иимэ мэдээ олон зурагуудтай хамта Соёлма Баяртуевна дурадхаба.

Википедиһээ абтаа

Тоолуурые һануулһан шубуухай

- Чижик-Пыжик, хаана байгаабши?

- Фонтанка дээрэ уһа уугааб!

Хоргодожо наададаг холшор бага наһыемни һануулһан тоолуурта хэлэгдэдэг шубуухайда зорюулһан хүшөө Санкт-Петербургын Фонтанкын дэргэдэ байгуулагдаһаар 25 жэл ноябриин 19-дэ гүйсэбэ. Энээн тухай Соёлма Баяртуевна фейсбук-хуудаһандаа мэдээсээд, тэрэ хүшөөгэй автор Вячеслав Бухаевтай зогсоһон гэрэл зурагаа дэлгээбэ.

facebook.com/Соёлма Дагаева

Энэ шубуухай тухай үльгэр домогууд уладай дунда тараһаар. Жэшээнь, 25 удаа энэ багахан шубуухайе хулуугаа гэжэшье хэлсэдэг байна. Теэдшье аза жаргал асардаг гэжэ олонхи зон этигэнэ, харшаһа хан гүүлэн үргөөд лэ гарадаг юм ха.

Нютагаймнай уран барималша Вячеслав Борисович аяар 150 гаран хүшөө Санкт-Петербургда бодхооһон байна.

Хохотуй болоһон Хуһата

Үбэр Байгалай хизаарай Петровск-Забайкальска аймагта оршодог Хохотуй гэжэ һуурин тон энеэдэтэй нэрэтэй гэжэ суурхахын тулада урилдаанда оролсожо байна. Хүршэнэртөө туһалая гэжэ “Буряад үнэнэй” захиралай орлогшо Норжима Цыбикова фейсбук-хуудаһандаа уряалба. Коммент бэшэгшэ нэгэнэй дуулгаһаар, Хуһата нютагые ородууд Хохотуй болгоо юм ха. Урданайнь нэрэ тиимэшье энеэдэтэй бэшэ байгаа болоно.

chita.ru

Ноябриин 11-һээ һанал хуряалгын һүүлшын шата эхилэнхэй. Мүнөө дээрээ Хохотуй 12,7 мянган дуу абаад байна. Түрүүлжэ ябаһан Мутный Материк гэжэ тосхониие хүсэхын тулада үшөө мянган дуун дуталдана. Архангельска можын Морозилка гэжэ тосхон гурбадахи һуурида гараад байна. Ноябриин 25 болотор хүнүүд дуугаа иимэ хаягаар: «Туту.ру» «ВКонтакте» үгэхэ аргатай.