Юрын үгэнүүдтэй аад, удха түгэлдэр шүлэгэй мүрнүүдые Интернедтэ уншаад, хэн бэшээ гээшэб гэжэ ехэтэ һонирхоо бэлэйб. Тиихэдэмни Элбэг Зандраев гэжэ залуу хүбүүн байшоо. Һаяхана шүлэгүүдэйнь согсолбори нара харабал даа. Энэ ушараар Элбэгтэй уулзажа харилсабаб.
Тракторист, уран зураашан, дуушан
Элбэг хадаа Могойто аймагай Хүһөөшэ нютагта түрэһэн байна. Тэндээ 6-дахи класс дүүргээд, түрэлхидтэеэ Могойто зөөжэ ерээ. Юһэдэхиин һүүлээр техническэ дунда мэргэжэлэй 23-дахи һургуулида хүдөө ажахын тракторист-машинистын таһагта ороһон. Эндэ һуража байхадань, эжынь хүбүүгээ Уралигай һургуулиин уран зурагай таһагта оруулһан юм. Тэндэ зурагай нюусатай танилсуулһан Сергей Доржиев багшань саашаа Шэтын ехэ һургуулиин уран зурагай таһагта орохыень дурадхаһан байна. Тракторист-машинистын мэргэжэлээ эрхим сэгнэлтэтэйгээр дүүргэһэн үнэмшэлгэ абаһан хүбүүхэн уран зураашан болохо хүсэлтэй дээдэ һургуулида һуража захалаа. Эгээл энэ үедэ Элбэг хүбүүнэй бэлиг элиржэ эхилээ гэхэдэ, алдуугүй.
Уран зурагай таһагай оюутан ябахадаа, үнгэтэ будагай юртэмсын түлхюур оложо эхилээ. Оршон тойронхи байгаали зурахадаа бэрхэ байнаш гэжэ Сергей Павлуцкий багшань хэлэдэг һэн. “Хүдөө нютагай үглөө” гэһэн зураг зуража, түгэсхэлэй шалгалтаяа хамгаалһан юм. Гэхэ зуура, оюутан ябахадаа, Шэтэ хотын залуушуулай байгуулһан “Бэлигүүн” гэһэн хамталигта оролсоод, дуу дуулажа эхилһэн. Дээдэ һургуулиингаа 2-дохи ангиин оюутан байхадаа, Агада эмхидхэгдэһэн “Гэсэр-Дангина” гэһэн харалганда хабаадажа, тойрог дотороо түрүүлээ бэлэй.
- Эгээл эндэ би тайзанай амта үзөө һэмби. Тиигэжэ дуу болон хүгжэмөөр һонирхожо эхилээб, - гэжэ Элбэг хөөрэнэ.
Угаа уһанда хаяагүй
Хүбүүхэн бага ябахадаа, бэлиг шадабарияа, хүсэл һаналаа балайшье мэдүүлдэггүй байгаа бшуу. Тиимэл хадань эжынь Цыбегмит Цыденешиевна хүбүүнэйнгээ ажабайдалайнь харгы аргаахан залажа үгөө гэлтэй. Хүбүүгээ хүдөө ажахын мэргэжэлдэ һургаха гэжэ шиидэхэдээ, гол түлэб хүбүүнэйнгээ бэлиг шадабари мэдээгүйдөө тиигээ бэшэ, харин зориг, эрмэлзэлыень хатуужуулхаал һанаа ёһотой. 15-тай хүбүүхэн хаанаһаа мэдэхэб даа, хэншье болохоёо байһанаа. Гэхэ зуура, хүнэй наһанайнгаа харгы шэлэлгэдэ үнэхөөрөөшье угай татаса шанга нүлөө үгэдэг ха юм. Элбэгэй нагасын талаһаа онсо бэлигтэйшүүл олон. Нагаса эжынь Дугарма Доржиевна Ага тойрогтоо мэдээжэ хүн, хүүгэдэй сэсэрлигые даагшаар ажаллаһан, өөрөө зураг зураха, юумэ зохёохо тусхай бэлигтэй юм. Нагасанарынь гэхэдэ, Буряадай элитэ ирагуу найрагша, мэдээжэ сэтгүүлшэн, олон жэлдэ “Толон” сониной ахамад редактор ябаһан Баатар Шагдаров, Буряадай мэдээжэ уран зураашан Бальжинима Доржиев. Иимэл хадань хүбүүхэнэй бэеэ хүсэжэ эхилхэдэ, угай татаса диилэжэл шадаа.
Хүгжэмшэн болохо хүсэл
Элбэг дээдэ һургуулияа дүүргээд, Ставрополиин хизаарай Будёновск хото шадар сэрэгэй алба гараа. Тэндэһээ Ага нютагаа бусаад, жэлэй туршада Дулдаргын соёлой түбтэ тайзан зохёон байгуулагшаар ажаллаа. Эндэ Элбэгэй зурадаг шадабаринь туһалаа. Элдэб наадануудта тайзан бэлдэдэг, зүжэгэй үйлэдэ таарама үзэгдэлнүүдые табиха, зураг, соносхолнуудые зурадаг байгаа. Мүн ямаршье артистнарһаа дутуугүй тоглолтонуудта хабаадалсадаг һэн.
Хэрбэеэ энээнһээ урид Элбэг эжынгээ, багшынгаа дурадхалаар мэргэжэл шэлэдэг байһан һаа, өөрынгөө дураар дуушан, хүгжэмшэн болохоёо хүсэһэн юм. Чайковскиин нэрэмжэтэ уралигай колледждо дуушанай таһагта һуража эхилээ.
- Би багадаа хүгжэмэй һургуули дүүргээгүй байгааб. Ното шудалха, фортепиано дээрэ наадажа һурахада бэлэн бэшэ ха юм. “Сольфеджио”, “Теория музыки” болон бусад хэшээлнүүд хэды хүшэршье һаань, үдэр бүри оролдосотойгоор һуража шудалаалби даа, - гэжэ Элбэг хөөрэнэ. Уралигай колледжын захирал Баир Турбяновай хэлэһээр, Элбэг шүлэг, дуу зохёодог байһанаа хэндэшье хэлэдэггүй һэн.
- Гэнтэ 4-дэхи курсын оюутан байгаад, “Шэнэ жэлэй баяр” гэжэ дуу зохёогооб гэжэ хэлэбэ. Тэрэ дууниинь бултанда һайшаагдажа, пианист багша Анна Копылова аранжировко хэжэ үгэһэн юм. Һүүлдэнь энэ дуундань бидэ клип зохёожо табяа бэлэйбди. Һуралсалдаа ехэ оролдосотой, угаа ехэ бэлигтэй хүбүүн, - гэжэ Баир Борисович тэмдэглэбэ.
Хүгжэмэй колледж Элбэг 2018 ондо дүүргээд, мүнөө Буряадай гүрэнэй оперо болон баледэй театрай хоорто дуулана.
Шүлэг бэшэнэ, хүгжэм зохёоно
Дүрбэн тээшээ тэгшэ бэрхэ гэхэ гү, али найман тээшээ бэлиг шадабарияа хүгжөөжэ ябаһан залуу хүбүүн таба-зургаан жэлэй туршада буряад хэлэн дээрэ шүлэгүүдые зохёожол байгаа. “ВКонтакте” гэжэ сүлжээн соо “Яһал ха” гэжэ хуудаһа нээгээд, шэнэ бүтээлнүүдтэеэ танилсуулдаг. Тэрэ шүлэгүүдыень залуушуул ехэтэ дэмжэнэ, буряадаар хүсэд ойлгохошьегүй һаа, дабтан сээжэлдэдэг болонхой.
Буряад Уласай Засагай газарай соносходог “Буряад хэлэ сахин хүгжөөхэ” гэһэн харалганда илажа, Элбэг Зандраев өөрынгөө ном хэблүүлхэ эрхэдэ хүртэһэн байна. Энэ дэмжэлтын ашаар гарта барюубшатай, удхаараашье яһала гүнзэгы ном нара хараба гээшэ.
Иимэ бэлигтэй хүбүүн алишье шэглэлдээ урагшатай ябана. Зүгөөр фортепиано дээрэ наадажа, шэнэ дуу зохёоходоо, сэдьхэлынь тон ехээр баясадаг юм байна. Саашадаа хэн болохоб гэжэ саг харуулха. Гэбэшье, мүнөө Элбэг сэдьхэлһээ гараһан мүрнүүдые