​​Буряад бууза амтатай даа!

Нижний Новгород хотын Минин болон Пожарский хоёрой нэрэмжэтэ талмай дээрэ Арадуудай нэгэдэлэй hайндэр эмхидхэгдэхэ үедэ «Дэлхэйн арадуудай эдеэ хоол» гэhэн үзэсхэлэн дэлгэгдэбэ. Тэндэ буряадаймнай бууза, мүн тиихэдэ дэлхэйн үсөөн тоото арадуудай эдеэнэй зүйлнүүдэй дээжэнь олоной дурадхалда табигдаа.

Эдеэ хоолой фестивальда 30 гаран можо нютагhаа үсөөн тоото арадуудай түлөөлэгшэд суглараа. Тодорхойлбол, Кузбасс, Хойто Осети - Алани, Алтай Улас, Алтайн хизаар, Краснодарай хизаар, Карел Улас, Мурманска можо, Удмурт Уласай хабаадагшад байгаа.

Тус hайндэрэй үедэ дэлхэйн элдэб арадуудай 150 гаран эдеэнэй зүйл үзэмжэдэ табигдаа. Дуратайшуул буряадай бууза, башкир арадай элеши, алтай зоной каардаг гэхэ мэтэ амтатай эдеэнэй дээжэhээ ама хүрэхэ аргатай байгаа.

Энэ хэмжээндэ хабаадалсагшад урдань нюдэ амандаа үзөөгүй эдеэ хоол амталхаhаа гадуур, өөhэдөө шанажа, бэлдэжэ туршалсаа. Тиигэжэ Нижний Новгород хотын ажаһуугшад болон айлшад буряад буузын амтатайе онсо тэмдэглээ.