1166
Түнхэн аймагай Шэмхын интернат-һургуулида бүхы хүндэ ажал Даша-Даба Базаровта даалгагдадаг. Тэрэ жолоошон байбашье, үгтэһэн хүдэлмэри шадамар бэрхээр бүтээдэг юм. Энээндэ түрэлхидынь багаһаа хойшо һургаһан байха.
Түнхэн аймагай Хойто-Гол һууринда Иннокентий Лопсонович ба Прасковья Дашеевнагай 10 үхибүүдэй нэгэн боложо, Даша-Даба мүндэлөө һэн. Абань «Туранай» совхозой түрүү механизатораар олон жэлдэ хүдэлөө. Тиимэһээ багаһаа хойшо техникэдэ аргагүй дүйтэй байһан Даша-Даба Иннокентьевичэй ерээдүйдэ хэн болохыень тухайлхаар һэн. Түнхэн һууринда тусхай мэргэжэлэй дунда һургуули дүүргэжэ, түрэл нютагтаа жолоошоноор хүдэлжэ эхилээ. Залуу хүбүүндэ һургуулиин автобус даалгагдаһан юм. Тиигэжэ мүнөө 25 жэл шахуу шэлэһэн мэргэжэлээрээ хүдэлжэ ябана.
Шэмхын һургуули-интернат ехээр огород таридаг юм. Тэндэнь хэрэглэгдэхэ оньһон техникэ Даша-Даба Иннокентьевичэй ашаар жэншэдгүй заһагданхай байдаг. Мүн һургуулиин автобус хэды үни удаан соо ашаглагдабашье, шэнэ мэтэ харагдадаг.
Һуралсалай гуламтын захирал Мария Борисовна Парпаевагай тэмдэглэһээр, Даша-Даба Иннокентьевич тон харюусалгатай, алтан гартай мэргэжэлтэн. Ажалшадайнгаа дунда хүндэтэй. Ямаршье багшада гү, али хүмүүжүүлэгшэдэ зүбшэл үгэхэ аргатай найдамтай нүхэр юм гэжэ Мария Парпаева хэлэнэ.
Олон жэлдэ аша габьяатайгаар хүдэлһэнэй түлөө урмашуулгада хүртөө. Аймагай Һунгамалнуудай зүблэлэй, спортын һургуулиин баярай бэшэгүүдые, хүндэлэлэй грамотануудые абаһан намтартай. Мүн тиихэдэ 2018 ондо Буряад Уласай Хүндэлэлэй грамотаар шагнагдаа. «Алгана-2016» гэһэн загаһа барилгын үедэ болоһон мүльһэн дээрэ шадамар бэрхээр машина жолоодоходоо, бусадһаа үлүү байжа, түрүү һуури эзэлээ һэн.
Даша-Даба Иннокентьевич гэр бүлэдөө, нүхэдтөө найдамтай тулга боложо үгэдэг хүн гээшэ. Наһанайнгаа нүхэр Виктория Буда-Жаповнатай хамта зохидоор ажаһуужа, хүбүүгээ гарынь ганзагада, хүлынь дүрөөдэ хүргэжэ байнхай. Хадам эжыдээ Антонида Лопсоновна Сыбиковада гурбан зөөлэниие үзүүлхэ гэжэ оролдоно.
Интернат-һургуулиин үхибүүд ганса Түнхэнэйнгөө һууринуудаар бэшэ, Буряад Уласайнгаа бусад аймагуудаар ябажа, элдэб урилдаа, мүрысөөнүүдтэ хабаададаг. Тэдэниие автобустоо һуулгахадаа, Даша-Даба Иннокентьевич альган дээрээ абажа ябаһандал зөөлэхэнөөр шэрэхэ гэжэ бүхы багшанар, хүмүүжүүлэгшэд, түрэлхид һанаа амар байдаг.
Соёлма БАЗАРОВА, Шэмхын интернат-һургуулиин багша
