561
Октябриин 28-һаа ноябриин 15 болотор хугасаада Буряадай 104 һургуулида уласхоорондын дүримөөр (PISA) һурагшадай бэлэдхэлэй шанар шэнжэлэлгэдэ хабаадана. Юуб гэбэл, байгша ондо Буряад орон уласхоорондын шэнжэлэлгын үнгэргэгдэхэ 14 можо нютагай тоодо ороо. Зорилгонь – 15 наһатай һурагшадай һуралсалай элдэб янзын шэглэлээр эрдэм мэдэсыень шалган сэгнэхэ.
- 2024 ондо болбосоролой хэмжээгээр дэлхэйн эрхим 10 гүрэнэй тоодо орохо зорилго урдаа табинхайбди. Тиихэдээ өөһэдынгөө зохёоһон дүримөөр элирүүлнэ бэшэбди, харин уласхоорондын шэнжэлгэнүүдэй дүнгүүд дээрэ үндэһэлэн, болбосоролой шанар сэгнэнэбди. Энэ талаар PISA эгээл хүндэтэй, тон шухала шэнжэлгэдэ тоологдодог, юундэб гэхэдэ, ЮНЕСКО-гэй дэмжэлгээр үнгэргэгдэдэг юм, - гэжэ Буряад Уласай болбосоролой болон эрдэм ухаанай сайдай орлогшо Валерий Поздняков онсолон тэмдэглээ.
Шалган сэгнэлгын материалнуудые Россиин түлөөлэгшэдэй хабаадалгатайгаар уласхоорондын мэргэжэлтэд зохёон бэлдээ. Хабаадагшадай дүүргэһэн даабаринуудые манай гүрэнэй экспертнүүд сэгнэхэ.
- Тус дүримөөр анхан үнгэргэгдэһэн шэнжэлгэнүүд 15 наһатай һурагшад бүлэгөөрөө хүдэлжэ шаданагүй болон бусадай амжалтануудта баярланагүй, ондоогоор хэлэбэл, гансал өөрынгөө амжалтын тула оролдоно гэжэ харуулаа. Баруун гүрэнүүдтэ бүлэгөөрөө хүдэлхэ шадабари үндэрөөр сэгнэгдэдэг ха юм даа, - гэжэ Валерий Поздняков хэлээ.
Болбосоролой шанар сэгнэлгэ үнгэргэхэ хэмжээндэ октябрь һарада олониитын асуулта эмхидхэгдээ. Асуултада 20 һургуулиин һурагшад, түрэлхид, хүтэлбэрилэгшэд болон багшанар хабаадаа. Шэнжэлгэдэ бэлдэлгын хэмжээндэ уласай аймагуудта тусхай зүблөөнүүд үнгэргэгдөө. Эмхидхэгшэд болон экспертнүүд шэлэгдээ, тьюторнууд томилогдоо.
Шэнжэлэлгын дүнгүүд байгша оной эсэстэ – ерэхэ жэлэй эхиндэ согсологдохо юм.
“Буряад үнэн” мэдээсэлэй албан
