1044
Аха аймагай ажаһуугшад байгаалиингаа баялигуудые хэрэглэн, эдеэ хоол бүтээжэ, наймаалжа эхилэнхэй. Мянгаад жэлэй хугасаадал эм домто сагаан дали, аарса, жэмэс суглуулжа, эдеэндээ хэрэглэнэ.
Өөрлиг һууринай Семён Саянович болон Сэсэгма Владимировна Хулуевтанай гэр бүлэ иимэ ажал гурбан жэлэй саана ябуулжа эхилээ.
- Нэн түрүүн эм домто ургамалнуудые суглуулжа, хатаажа эхилээбди. Юуб гэхэдэ, тэдэниие зүб хэрэглэбэл, олон тоото үбшэндэ нэрбэгдэхэгүйш. Мүнөөшье болотор суглуулнабди. Илангаяа сагаан дали газаагаа ургуулжа туршаагүйбди, - гэжэ Сэсэгма Владимировна хөөрэнэ.
Ой модо руу ябахадаа, гэрэй эзэн ангай мяха асардаг байгаа ааб даа. Тиигэжэ гэртээ уран гартай нүхэрынь ан гүрөөлэй мяхаар амтатай консервэ ходо хэдэг байгаа. Хубиин ажал эрхилжэ эхилхэдэнь, энэнь тон ехээр туһалаа.
- Ахамнай һарлагаар баян юм. Манай нютагай баялиг гэбэл, алдуу болохогүй. Бидэ хүн зонһоо һарлагай мяха худалдан абажа, тушёнко хэдэг болообди. Мүнөө тиимэ ехээр хэнэгүйбди, ганса хүнүүдэй захилаар бэлдэнэбди, - гэжэ Сэсэгма Хулуева хэлэнэ.
2019 ондо «Саяны» гэһэн тус ажахы аймагай захиргаанай туһаламжаар шэнэ оньһон техникэ худалдан абажа байна. Тэрэнэй ашаар амтатай консервэнүүд бүри һайн шанартайгаар бэлдэгдэхэ. Мүн тиихэдэ һүнэйшье зүйлнүүдые хэхэ арга боломжо олгогдоно. Ажахын гэшүүд саашадаа сахартай үдхэрүүлһэн һү (сгущёнко) хэхэ түсэбтэй.
Хажуугаарнь эм домто ургамалнуудые буйлуулха оньһон техникэтэй болоо. Бэе махабадта һайнаар нүлөөлдэг арсын, һамарай, жодоогой тоһон худалдаанда үргэнөөр табигдадаг болохоор хараалагдана.
- Шэнэ жэлһээ хойшо манай эмхи хүгжэлтын шэнэ харгыда гаража, бүри эршэтэйгээр, арад зондоо туһатайгаар хүдэлжэ эхилхэ, - гэжэ «Саяны» ажахын хүтэлбэрилэгшэдэй нэгэн Сэсэгма Хулуева мэдүүлнэ.
Алексей Жилинэй гэрэл зураг
Автор: Борис БАЛДАНОВ
