​​Ойн хоол бэедэ һайн...

Алим жэмэсээр, һамараар, эм домто ургамалнуудаар Захаамин аймаг баян юм. Тэдэниие буйлуулха талаар ажахы Мэлэ һууринда һаяхана байгуулагдаа.

Мэлын сомоной дарга Роман Жаповай тэмдэглэһээр, һүүлэй үедэ арад зон сэбэр экологическа эдеэ хоол худалдан абажа эдихэ гэжэ оролдоно. Теэд тэрэнь хомордоно.

- Ой модон соогоо ургадаг бүхы алим жэмэсээ, һархяагаа, һамараа суглуулжа буйлуулха һанаан байна. Тиимэһээ «Мэлын баялиг» гэһэн ажахы байгуулаабди. Ерэхэ үбэл, хабартаа шэнэ оньһон техникэ худалдажа абахабди. Ажалнай һаял эхилхэнь гээшэ, - гэжэ Роман Жапов хөөрэнэ.

Һаяхана Улаан-Үдэдэ үнгэргэгдэһэн үүлтэртэ малай үзэсхэлэнэй үедэ «Мэлын баялиг» буйлуулжа байһан эдеэ хоолой зүйлнүүдээ асаржа танилсуулаа. Мойһоор, шасарганаар, алирһаар, үхэр нюдөөр болон бусад жэмэсээр хэгдэһэн варени болон шүүһэн олондо һайшаагдаа. Үзэсхэлэндэ хабаадагшад сагаан далитай сай амталжа үзөө. Энэ ажахын дабһалагдаһан һархяаг, гэртээ баригдаһан хилээмэ хүн зон хямда сэнгээр худалдажа абаа.

- Шэнэ оньһон техникэ абаһанайнгаа удаа экологическа сэбэр тусхай амһартада хэжэ, худалдаанда табихабди. Тиигэбэл ажахымнай хүсэд хүдэлжэ эхилхэ бэзэ. Манай нютагай зондо ашагтай байха. Юуб гэхэдэ, арад зон ой модоор ябажа, жэмэс, һархяаг, һамар суглуулжа, «Мэлынгээ баялигта» тушаажа, хармаандаа мүнгэтэй болохо бшуу. Ажалай һууринууд нээгдэжэ, хүн зомнай салин абажа эхилхэ. Тиимэһээ бүхы гүрэнэй түсэлнүүдтэ орожо, мүнгэ абаха һанаатайбди, - гэжэ Роман Жапов түсэбөөрөө хубаалдана.

Мэдээн.

Сагаан дали (Рододендрон Адамса) – үндэр хадануудай хормойдо дайралдадаг 50 сантиметр хүрэтэр үндэртэй ургамал. Түнхэн, Аха, Захаамин аймагуудта дайралдадаг.

Сагаан далиин зүбөөр хатаагдаһан намаа хүнэй бэе махабадта һайнаар нүлөөлдэг. Хүнэй бэеын үбшэнтэй тэмсэлгын шадабари һайжаруулдаг, тэнхээ тамир оруулдаг, даралта доошонь буулгадаг, ханяада хамшагһаа, грипп үбшэнһөө эдэгээдэг г. м. олон талын ашаг үрэ ехэтэй ургамал гээшэ. Сагаан далиин намаае халуун уһанда гү, али сайда хээд ууха хэрэгтэй.

Алексей Жилинэй гэрэл зураг