934
Муя аймаг байгуулагдаһаар 30 жэлэйнгээ ойн баяр тэмдэглэбэ. Буряад Уласай Арадай Хуралай Түрүүлэгшэ Владимир Павлов, Хүдөө ажахын үйлэдбэриин комплекс болон хүдөө дэбисхэрнүүдые хүгжөөлгын талаар Буряад Уласай Засагай газарай Түрүүлэгшын орлогшо Даба-Жалсан Чирипов, һунгамал Евгения Лудупова гэгшэд ойн баярай хэмжээ ябуулгануудта хабаадаа.
Анхан Муя аймаг Бабантын аймагтай нэгэн байһан юм гэжэ һануулая. Мүнөө аймаг эдэй засагай талаар яһала һайн байдалтай. 9 янзын ашагта малтамалай 50 хэбтэшэ шэнжэлэгдэнхэй. 2035 он болотор хугасаада ниигэмэй-эдэй засагай хүгжэлтын программа баталагданхай. Тэрэнэй хэмжээндэ ниигэмэй-соёлой болон олониитын объектнүүд бодхоогдоно. 2018 оной ноябрь һарада Ородой Юрэнхылэгшын зарлигаар Буряад ороной Алас Дурнын тойрогто оруулагдахада, Муя аймагай урда шэнэ арга боломжонууд нээгдээ. Уласай хэмжээндэшье нилээд ехэ хэмжээнүүд абтана.
Мүнөө Байгал-Амарай түмэр зам хүгжэһөөр зандаа. 2020 ондо зам барилгын хоёрдохи шата эхиеэ абаха. Хойто Муяын тоннелиин хоёрдохи һалаа бариха тухай шиидхэбэри абтанхай. Һаяын табан жэлэй туршада 1300 модоной зайда түмэр харгы татагдаха юм.
Ойн баярта ерэһэн үндэр айлшад Буряад Уласай Толгойлогшын, Арадай Хуралай болон Засагай газарай үмэнэһөө аймагай түб больницада эмшэлэлгын тоног түхеэрэлгэ худалдажа абаха үнэмшэлгэ барюулаа. Владимир Павлов ажал хэрэгтээ амжалта туйлаһан нютагаархидта хүндэлэлэй грамотануудые болон баярай бэшэгүүдые барюулаа.
Хоёрдохи үдэртэнь Валерий Говоровой дурасхаалда зорюулагдаһан волейболоор мүрысөөн эмхидхэгдээ. Гадна мэдээжэ олзын хэрэг эрхилэгшэ болон эбээн тэдхэгшэ Валерий Назаровай бариһан барилдаанай найман ханатай гэр соо боксоор болон барилдаагаар мүрысөөнүүд үнгэргэгдөө.
Буряад Уласай Арадай Хуралай мэдээсэлэй албанай гэрэл зураг
