​​Далай ламын үршөөлтэй

Заха холын Захааминай Санага нютагта 41 метр үндэртэй, 30 метр үргэнтэй Арьяа-Баала бурхан бүтээгдэжэ залархань гэжэ сониндоо нэгэтэ бэшэ дуулгаа һэмди.

Мэдээжэ уран зурааша, уран барималша Юрий Мандаганов түрүүтэй уран дархашуул Арьяа-Баала бурханай хүрэг хэһэг хэһэгээрнь Ивалга аймагай Нуур-Сэлеэн һууринда бүтээнэ.

- Дулаанай сагта шэрдэхэ, шэмэглэхэ ажал үргэлжэлхэ. Мүнөө хүрэгэй һуури «лёнхобо» гагнууршад эхилэнхэй. Бүхы ажалай дүүрэхэдэ, хүрэгөө Санага абаашажа бодхоохо ехэ ажал гараха, - гэжэ буян үйлэдэлгын «Нэгэдэл» жасын түрүүлэгшэ Солбон Будаев тэмдэглээд, - байгша ондо Санагын дасанай лама Джампа Монлам (Баир Цыденов) Далай ламада морилжо, Арьяа-Баала бурханай хүрэг бүтээхэ гэжэ үршөөлдэнь хүртөө, - гэжэ нэмэбэ.

Арьяа-Баала бурхан ерэхэ жэлэй зун заларха гэжэ түсэблэгдэнэ. Сентябрь һарада Буддын шажантанай заншалта Сангха энэ дэмбэрэлтэ хэрэгтэ 1 сая түхэриг һомолһон байна. Мүнөөшье Арьяа-Баала бүтээхэ нарин хэрэгтэ мүнгэ алта суглуулха, туһаламжын марафонууд, хэмжээ ябуулганууд үнгэргэгдэнэ. Саашадаа Арьяа-Баала бурхан аяншалгын тусхай түсэлэй шухала үндэһэн болохоор хараалагдана.

facebook.com/Татьяна Гулгенова