904
«Буряад үнэн» Хэблэлэй байшанай соёл болбосоролой «Амар мэндэ» түбтэй эб хамта соносхоһон «Хүхюу зохёолшон» урилдаанда эдэбхитэйгээр хабаадаһан хүхюу хүгтэй уран зохёолшодой хэблэгдэһэн зохёолнуудай дүнгүүдые шүүгшэд элирүүлээ.
Мүнөө жэл даншье һаа олон хошон хөөрөөнүүд урилдаанда ерэжэ, «Буряад үнэн» сониной нюурнуудта зариманиинь багтаагүй. Тиимэһээ «Буряад үнэнэй» сайт дээрээ булта толилогдоо. Тиигэжэ бүгэдэ зон уншаха аргатай болоо.
Тиимэһээ сониноймнай хуудаһануудта зохёолнуудые уншаагүй хүнүүд сайт дээрэмнай хүсэд дүүрэнээр уншажа, сэдьхэлээ хужарлуулжа, эльгэеэ баярлуулыт!
Урилдаанда эдэбхитэй хабаадаһан Лубсан Цыренов, Тимофей Нимбуев, Эдуард Будаев, Ярууна аймагай Мужыхын номой сангай ажалшад, Элбэг Зандраев, Мария Сыдеева, Евгения Раднаева, Эржена Базарова, Цырен- Дулма Чимитова, Очир Нурбаев, Бэлигма Дабаева, Баярма Баторова, Ринчин Санданов, Владимир Бухаев гэгшэдые октябриин 25-да Хоца Намсараевай нэрэмжэтэ Буряад драмын театрта хүндэтэйгөөр уринабди.
Эдэнэй дундаһаа шалгаржа гараһан «хүхюу зохёолшоной» нэрэ тайзан дээрэһээ соносхогдожо, 30 мянган түхэригэй гол шан барюулагдаха.
Заншалта «Буряад хэлэнэй үдэр» гэһэн хэмжээ ябуулгануудай үрэ дүнгүүдые согсолһон энэ һайндэртэ «хүхюу зохёолшодые» амаршалга болон илагшадта шагнал барюулга баярай оршон байдалда үнгэргэгдэхэ.
Эмхидхэлэй хороон
