989
Дурасхаалай зураг
Буряад хэлэнэй hайндэрэй шугамаар, габшагай һарын түсэбөөр Буряадай гүрэнэй Доржо Банзаровай нэрэмжэтэ ехэ һургуулида “Буряадаараа уншая” гэhэн урилдаан үсэгэлдэр үнгэрбэ. Үндэһэн хэлэн дээрээ дуулдахаар уншалгын нютаг можо хоорондын энэ турнир хоёрдохиёо манай ехэ һургуулида эмхидхэгдээ.
Тус мүрысөөндэ табан дээдэ hургуулиhаа 38 оюутан хабаадаа. Манай БГУ-гай, Эрхүүгэй гүрэнэй ехэ һургуулиин, Зүүн Сибириин технологи болон хүтэлбэриин ехэ һургуулиин, Буряадай гүрэнэй хүдөө ажахын академиин, Зүүн Сибириин гүрэнэй соёлой дээдэ һургулиин команданууд хаба шадалаа туршаабди.
Урилдаанай үедэ
Зүүн зүгэй дээдэ һургуулиин буряад болон эвенк хэлэ бэшэгэй тэнхим эмхидхэгшэнь болоно. Мүрысөөмнай гурбан шатаһаа бүридэһэн байгаа. Түрүүшын тур Хоца Намсараевай шүлэгүүдые уншаха дабаа хорин табан оюутад дабажа гараа. Һүүлдэнь хоёрдохи тур баhал энэ агууехэ уран зохёолшын зүжэгүүдые, үргэлжэлһэн зохёолынь (прозо) уншажа, гурбадахи шатада арбан нэгэн оюутад гараа. Удаань гурбадахи турта хабаадагшад бүхы дэлхэйн классика зохёол уран hайханаар уншаа. Тэрэнэй һүүлдэ шангай һууринудые эзэлэгшэд тодороо.
“Буряадаараа уншая” гэжэ мүрысөөнэй хоёр бүлэг илагшадтай. “Уран уншалга” гэһэн номинацида Нэгэдэхи hуури Булат Ачитуев (БГСХА), хоёрдохи һуури Номин Сандитова (ИГУ) эзэлээ. Гурбадахи hуурида Наталия Гаврилова (ВСГИК) гаража шадаа. «Зүжэглэн найруулжа уншалга» (“Артистизм”) гэһэн номинацида түрүүшын һуури БГУ-гай оюутан Лубсан Бальжуров эзэлээ. Хоёрдохи һуурида Димит Ешиева, гурбадахи һуурида Эрдэм Будаев гараһан байна. Эдэ хоёр оюутад хоюулаа ВСГУТУ-да һурадаг.
Мүрысөөндэ илагшад (зүүн гарһаа): Владислав Дамбинов, Лубсан Бальжуров
Урилдаанай Гран-при шанда эдэ мүрнүүдэй автор хүртэһэн байна.
Буряад Уласай Болбосоролой болон эрдэм ухаанай яаманай Буряад хэлэ хүгжөөхэ талаар улас түрын түбэй хүтэлбэрилэгшэ Баяр Балданов, Буряад Уласай Болбосоролой бодолгын дээдэ һургуулиин ахалагша багша Ханда Цыденова болон Буряад театрай мэргэжэлтэн Намжилма Цыденова гурбан урилдаанаймнай шүүгшэд байгаа. Жюрин гэшүүд бултандамнай баяр хүргөө, амжалта хүсөө һэн. Урилдаанда хабаадалсаһан БГУ-гай Зүүн зүгэй институдай оюутан Антон Криволаповые онсолон тэмдэглэһэн байна.
Түгэсхэлдэнь Болбосоролой яаманай мэргэжэлтэн Жаргалма Дондокова, энэ урилдаанай автор, манай багша, хэлэ бэшэгэй эрдэмэй дид-доктор Лариса Халхарова, буряад болон эвенк хэлэ бэшэгэй тэнхимые даагша Сергей Ошоров, мүн тиихэдэ дээдэ һургуулинуудай багшанар мүрысөөндэ хабаадаһан маниие амаршалаа.
Авторай гэрэл зурагууд
Владислав ДАМБИНОВ, Буряадай гүрэнэй Д. Банзаровай нэрэмжэтэ ехэ һургуулиин оюутан
