611
Ородой Холбоото Уласай Гэгээрэлэй яаманай “Земскэ багша” программаар дурадхалнууд Буряад Уласта ерээ. Тус программа хүдөөгэй һургуулинуудта хэрэгтэй багшанарые хабаадуулхада туһа болохо.
50 мянга хүрэтэр ажаһуугшадтай һуурин, тосхон, хотын түхэлэй тосхон гү, али хотодо ажалда ороһон багшанар 2020 оной январиин 1-һээ1 сая түхэригэй нэгэ түлэгдэхэ тэдхэмжэдэ хүртэхэ аргатай.
Мүнөө Ородой Холбоото Уласай Гэгээрэлэй яаманда хуули ёһоной шиидхэбэри бэлдэгдэжэ, тэрэнэй ёһоор, Алас Дурнын федеральна тойрогто тэдхэмжэ 2 сая түхэригтэ хүрэхэ.
Программада 55 наһа хүрэтэр багшанар хабаадаха аргатай. Тэдэнэр болбосоролой эмхидэ мэдүүлгэ оруулха юм. Тэдхэмжэдэ хүртэхэдөө, багша хүн һургуулида табан жэлэй туршада хүдэлхэ уялга даажа абаха. Мүнгэ гаргашалхые абагшад өөһэдөө мэдэхэ.
2020 оной январиин 10-һаа апрелиин 15 болотор конкурсын шэлэлгэдэ хабаадаха мэдүүлгэнүүд абтаха.
Мүнөө дээрээ Буряад Уласта болбосоролой 992эмхи хүдэлнэ. 15 мянга гаран багшанар 197 мянган хүүгэдые һургана. Хүдэлжэ байһан болбосоролой эмхи зургаанууд багшанараар хангагданхай.
2019-2024 онуудта Буряад уласта “Демографи”, “Болбосорол” гэһэн үндэһэн түсэлнүүдэй ба “Болбосорол хүгжөөлгэ” гэһэн гүрэнэй программын хэмжээндэ Улаан-Үдэ хотодо, Ивалга, Загарай, Тарбагатай, Ярууна, Кабанск, Түнхэн аймагуудта 22 хүүгэдэй сэсэрлиг ба 11 һургуули баригдаха. Тэндэ 1090 багшанар хүдэлхэ. Тиихэдэ хүдэлхэ 629 багшанар бии һаань, үшөө 461 багшанар дуталдана. Байгша жэлдэ 75 багшанарые олохо хэрэгтэй, 2020 ондо – 147, 2021 ондо – 239. Һургуулинуудта гадаада хэлэнүүдэй, тоо бодолгын, эхин шатын ангиин, ород хэлэнэй ба литературын багшанар дуталдана.
“Земскэ багша” гэһэн программа эхилхые 2019 оной февраль соо Ородой Холбоото Уласай Юрэнхылэгшэ Владимир Путин Федеральна Суглаанда захил-хандалгадаа дурадхаа һэн гэжэ һануулая.
Анна Огороднигой гэрэл зураг
