Буряад Уласай ажаһуугшадта, илангаяа олон үхибүүтэй эжынэртэ болоод наһатайшуулда гүрэнэй ямар шэнэ туһаламжа үзүүлэгдэнэб гэжэ Буряад Уласай Ниигэмые хамгаалгын яаманай мэдээсэлэй албанай мэргэжэлтэн Светлана БАЗАРОВА дуулгаба. Тиихэдээ олоной үшөө ойлгоогүй, дуулаагүй дэмжэлтэнүүдые онсо тэмдэглээ.
Ородой Холбоото Уласай ажалай сайд Максим Топилинай захирамжаар, сэсэрлигүүдтэ ясельна бүлгэмүүд һэргээгдэжэ эхилхэ юм. Тиигэжэ залуу эжынэр багашуулаа сэсэрлигтэ тушаагаад, эртүүр ажалдаа гараха арга боломжотой болохо аабза.
Тиихэдэ Алас Дурнын тойрогой бүридэлдэ Буряад Уласай ороһоной ашаар гүрэнэй туһаламжа үзүүлгэдэ зарим тэды хубилалтанууд оруулагдаа. Тэрээн тухай олонхи зон мэдэнэгүй. Жэшээлхэдэ, 2018 онһоо үхибүү нарайлһан бүхы эхэнэрнүүдтэ тусхай туһаламжа мүнгэн үгтэжэ эхилээ. Тэрэнь 2-то үсхэһэн ажаһуудалай бага зэргын (прожиточный минимум) хэмжээнэй юм. Хэдышье олзо оршотой гэр бүлэнүүд иимэ туһаламжа абаха эрхэтэй. Тиимэһээ ниигэмые хамгаалгын таһаг руу хандыт гээд, яаманай мэргэжэлтэн уряална.
Гадна олон үхибүүтэй гэр бүлэнүүдтэ газар үгтэхэеэ болинхой. Тиигэбэшье уласай эхын капитал (136 мянган түхэриг) абажа, үхибүүнэйнгээ һуралсалда гү, али гэр байра худалдан абалгада шэглүүлхэ аргатайт.
Үхибүүтэй гэр бүлэнүүдтэ 5-6 процент хүнгэлэлтэтэй ипотекэ үгтэжэ эхилээ. Буряад Уласай 10 мянга гаран зон энэ урьһаламжа абаха аргатай юм. Уласаймнай дэбисхэр дээрэ 5 банк энэ ипотекэ үгэхэ эрхэтэй. 2019 онһоо олон үхибүүтэй болоһон эхэ гү, али эсэгэ 450 мянган түхэриг нэгэ удаа абаха болоно. Тиигэжэ хүдөөдэ шэнэ гэр гү, али хоёрдохи гарһаа гэр худалдан абажа болоно. Харин хотодо заабол шэнэ гэр байра абаха ёһотой юм.
Тиихэдэ наһанай амаралтада гарахаяа байһан уладта шэнэ мэргэжэл шудалха арга боломжо олгуулагдана. Байгша ондо, жэшээнь, 175 хүн үһэшэн, тогоошон гэхэ мэтын шэнэ мэргэжэлтэй болоо. Хүдөөһөө хото руу зөөһэн зондо энэ арга боломжо тон туһатай байна.