Манай хүгшэн аба Будажап (Лубсан-Ешэ) Бадмаевич Баинов 7 хүбүүд ба 1 хүүхэнтэй байгаа. Тэрэ 1940 ондо Москвада үнгэргэгдэһэн Буряадай соёл искусство болон уран зохёолой түрүүшын декадада хабаадалсаһан юм.
Түрүүшын гэрэл зураг дээрэ - Будажап Баинов Цэдэн–Дамба хүбүүтэеэ Москва хотодо.Минии аба Дамба Будажапович Баинов дайнай урда тээ Москвада түүхын-архивна институдта һураһан. Хуушан монгол, түбэд хэлэ бэшэг мэдэдэг һэн. Мүнөө жэл абынгаа хуушан монгол хэлээр бэшээтэй домог оршуулжа, түрэлхидөө урижа, хөөрэжэ үгөөб.
Гарма Будажапович Баинов баабаймнай лама байһандаа, түрмэдэ һуулгагдаа һэн. 4 хүбүүн, 1 басагатай. Хүбүүдынь булта уран дархашуул: Дэмбрэл Гармаевич мүнөө Москвада мэдээжэ скульптор Даши Намдаковой мастерскойдо хүдэлнэ. Дугар-Сурун Гармаевич Цыден- Дамба Гармаевич хоёр дайнай ба ажалай баатарнуудта бодхоогдоһон хүшөөнүүдые бүтээлсээ, гантиг шулуун дээрэ нэрэнүүдыень һиилэжэ мүнхэлөө. Еши Гармаевич - ууган хүбүүниинь 14 наһанһаа нютагтаа ажаллажа, дүүнэрээ гарыень ганзагада, хүлыень дүрөөдэ хүргэлсөө. Мүнөө 70 наһаяа угтажа байхадаашье, одхон хүбүүндээ гэр барина.
Наһанайм нүхэрэй аба – хадам абамни (зүүн талаһаа 1-дэхи) Базар Доржиевич Гармаев. Бүхы наһаараа нютагтаа хонишоноор, механизатораар, нуга сабшалан уһалагшаар хүдэлөө, номгон зантай, ажалша хүн байһан.
Минии аба (зүүн талада зогсоно)Баинов Дамба Будажапович. Зоотехник мэргэжэлтэй байһан, олон жэлдэ госстрахта хүдэлөө. Залуу наһандаа түрүүлэгшөөршье хүдэлөө. 5 басаган, 1 хүбүүтэй. Абын нүхэр Лубсан-Цэрэн Дондопов: «Дамба гээшэмнэй угаа ехэ юумэ мэдэдэг, олон номуудые уншаһан хүн юм», - гэжэ хөөрөө һэн.
Дэлгэрэнгыгээр өөрынгөө уг гарбал тухай бэшэһэн байна. Мүнөө 17 үе болонхой. Одоол ехэ һонин намтартай байһан гээшэ.
Манай эгээ ехэ аха Чимит Жалсараевич Баинов. 60-аад жэл ПВЗ-гэй жолоошоноор хүдэлөө. Мүнөө 82 наһаяа шахажа ябана. Олон нютагаар, олон мянган модо ябаһан хүн. Хэды хүндэ туһа хүргөөб, хэды мянган модо Украинаһаа эхилээд, машинаар ябаа гээшэб. “СССР-эй түмэр замай хүндэтэ хүдэлмэрилэгшэ” гэжэ нэрэ зэргэтэй.
Хүгшэн абымнай хүбүүн Цэдэн-Дамба. Хажуудань монгол нүхэрынь. Цэдэн-Дамба Будажапович уран зурааша, оршуулагша. 1940 ондо абатаяа Буряадай түрүүшын искусство ба литературын декадада хабаадалсаһан байна. Хойто жэл дайнай үнгэрһөөр 75 жэлэй ой болохонь. Үсөөн лэ дайнай ба ажалай ветеранууд үлөө.
Иигээд лэ энэ hайхан орондомнай, бүхы энэ дэлхэй дээрэ улад зон дайн сэрэг бү үзэг, энхэ тайбан байдал мандаха болтогой!
Баинов Жалсарай Будажапович ба Дэмбрэл Будаевна хоёр үхибүүдээрээ, аша зээнэртэеэ.
Гармаев Тама-Сурун Чагдурович наһанайнгаа нүхэр Анна Жалсараевнатаяа, Ольга Зандировна, Дэмбрэлцо Даши-Жамцуевна.
Баинова Доржо-Ханда Будажаповна – Будажап Бадмаевичай 80 наһатай басаган. Дээдэ-Бургалтай нютагтаа 87 наһатай болоо.
Эдэ гэрэл зурагуудые эльгээһэн Светлана Дамбаевна Гармаева– багша, Зэдын Дээдэ-Бургалтайн басаган