643
Үнгэрэгшэ долоон хоногто Улаан-Үдэдэ бүхы Сибириин федеральна тойрогой 1998-2000 онуудта түрэһэн столой теннис наадагшад сугларжа, эрхимүүдые элирүүлбэ. Өөрын талмай дээрэ болоһон энэ мүрысөөндэ Буряадай тамиршад оройдоол гурбан медаль абажа шадаһан байна.
Бүхы дээрээ 150 теннисист суглараа. Тэдэ хүбүүдэй, басагадай дунда табан бүридэлөөр мүрысэбэ. Тэдээн сооһоо оройдоол хоёр Буряадай тамиршад шалгараа.
Захааминай аймагай Тумэн Батуев хоёрлжон хүбүүд, басагадай (смешанный парный разряд – прим. авт.) наадануудта Эрхүүгэй можын спортын мастерай кандидат Алина Арбатскаятай һайн дүн харуулаа, ганса Хакас Уласай түлөөлэгшэдтэ шүүгдэжэ, шангай хоёрдохи һуурида гараа.
Улаан-Үдэ хотын 1-дэхи дунда һургуулиин 11-дэхи классай шаби Кирилл Джабаев хоёр хүрэл медальда хүртөө. Тэрэ хубиин наадануудта шангай 3-дахи һуури эзэлхын түлөө уулзалгада Кемеровскэ можын Александр Лоосые шүүжэ гараа. Харин Кемеровэй Евгений Фоминтой нэгэ команда болон наадаад хүрэл медальда хүртөө.
- Иимэ томо мүрысөөнүүдтэ хабаадаха дүршэлгүй байһыемнай тус мүрысөөн гэршэлээ. Бидэ жэлэй хугасаада оройдоол нэгэ хэды нааданабди. Мүн тиихэдэ Буряадһаа холо гараа һаамнай һайн байгаа, - гээд Кирилл Джабаев .
Хүрэл медальда хүртэһэн Кирилл Джабаевай хэлэһэндэ этигэхээр. Манай республика дотор столой теннис наадаха дуратайшуул хэды олоншье һаа, саашаа ургаха хараагүй ябана. Түрэл нютагтаа мүрысөөндэ шалгаржа, удаадахи шатын наадануудта хабаадажа шаданагүй. Шалтагааниин эли - нютагһаа холо мүрысөөндэ ошоходо бюджедтэ мүнгэн байхагүй.
Хэды дүй дүршэлтэй болобошье саашадаа тэрээнээ хаана хэрэглэхэб гэжэ тамиршад ойлгоногүй. Эгээл энэ ушарта столой теннисээр команда хэрэгтэй байгаа. Арбаад жэлэй саана манай ниислэл Улаан-Үдэдэ “Байкал” болон “СИТЕК” гэһэн команданууд байгуулагдаа һэн. Түрүүшээр тэндэ ганса Буряадай столой теннисэй һоригшод наадагша бэлэй. Бүхы Россиин шанга тамиршадтай хамта наадажа Дмитрий Цыбикдоржиев, Андрей Власов болон бусад эдиршүүл яһала дүйтээ болоо һэн. Россиин клубнуудай дунда чемпионадай эгээл томо премьер-лигэдэ наадаһаншье түүхэтэй.
Эгээл тэрэ үедэ энэ федерациин түрүүлэгшэнэр өөһэдын болон спонсорнуудай мүнгөөр столой теннисэй танхим бариха тухай дурадхал хэдэн жэл соо оруулһан байна. Тиихэдэнь, Улаан-Үдэ хотын дэбисхэр дээрэ газар олдоогүй бшуу. Тиимэһээ манай уласай столой теннисэй хүгжэлтэ олон жэлнүүд соо зогсошоод байна гээд һанагдана.
Хэды тиигэбэшье, манай ниислэл хотодо Сибириин федеральна тойрогой түхэлэй мүрысөөн 20 жэл болоошьегүй һаа, иимэ наадануудые шадамар бэрхээр Буряадай эмхидхэгшэд үнгэргөө гээд, хэлэхэдэ шухала.
- Федеральна тойрогуудай мүрысөөнүүд 4-8 стол дээрэ эмхидхэгдэхэ аргатай. Харин манай эндэ ФСК соо аяар 12 стол дээрэ нааданууд болоно. Энэ хадаа уласхоорондын гуримда хүртэхөөр жэшээтэй. Зарим мүрысөөнүүдтэ ошоходошни тон бага, уйтан танхим соо болохо. Олоор ерэһэн айлшад, иимэ гоё танхим соо һайнаар мүрысөө үнгэргэхэдэмнай баярлана, маанадта һайниие хүргэнэ. Ушар гэхэдэ, Новосибирск, Красноярск болон бусад томо хотонуудта столой теннис наадагшадые томо танхим соо оруулнагүй бшуу, - гэжэ мүрысөөнэй ахамад секретарь Владимир Песков хөөрэнэ.
Тэрээнэй мэдээсэһээр, апрель һарада Сибириин тойрогой 2004 онһоо бага наһатай хүбүүд, басагадай мүрысөөн баһа манай уласта болохоор хараалагдана. Улаан-Үдэдэ тэдэ ерэхэ гү, али үгы гү гэжэ хоёр-гурбан долоон хоногой һүүлдэ мэдэгдэхэ.
Борис БАЛДАНОВ,
авторай фото-зурагууд.
