780
Санаар урилдаан
2018 ондо үбэлэй Олимпиин нааданууд Солонгос ороной Пьёончанг хотодо болохоор хараалагдана. Тэрэ болотор хоёр жэл үлэбэшье, һаяхана тэндэ санаар урилдаагаар уласхоорондын мүрысөөн болобо.
Тус хэмжээ ябуулгада Буряадаймнай санашан Алиса Жамбаловагай хабаадаһаниинь удхатай. Юуб гэхэдэ, 2018 ондо манай басаган Олимпиин наадануудта хабаадажашье магадгүй.
Энэ мүрысөөндэ Алиса Жамбалова хоёр дахин түрүүлжэ гараа. «Альпенсиа Резорт» (Alpensia Resort) гэжэ нэрэтэй газарта Алиса 5 болон 15 километр зайда бултаниие хойноо үлөөгөө.
***
Аха захатанай дунда Россиин чемпионадта Буряадаймнай тамиршан Григорий Цыренович Цыбиков гурбан медаль абаба. Ижевск хотодо үнгэргэгдэһэн бүхэроссиин чемпионадта тэрэ 70 үлүү наһатайшуулай дунда хабаадаһан байна.
Классическа гуримаар 5 км зайда Григорий Цыбиков алтан медальда хүртөө. Харин 10 болон 20 км тэрэ хоёрдохи шангай һууринуудые эзэлһэн байна.
Бокс
Командна тоосооной бүхэдэлхэйн (WSB) мүрысөөндэ Россиин суглуулагдамал команда “Rafako Hussars Poland” гэһэн Польшын боксёрнуудые 4:1 гэһэн тоотойгоор шүүжэ гараба. Энэ удаа Россиин командын бүридэлдэ Буряадһаа уг гарбалтай, мүнөө үедэ Москвада һорилго хэдэг Бэлик Галанов оруулагдаа. 49 килограмм хүрэтэр шэгнүүртэ тэрэ өөрынгөө уулзалгада илалта туйлаа.
Тиигэжэ Россиин команда дүрбэн уулзалгадаа бултыень шүүжэ гараад, өөрын бүлэг соо түрүү һуурида ябана. Удаадахи уулзалгаяа Россиин боксёрнууд Венесуэлын командатай апрелиин 1-дэ үнгэргэхэ. Эдэ командануудай түрүүшын уулзалгада Батор Сагалуев хабаадаа бэлэй гээд һануулая.
***
Финляндиин ниислэл хото болохо Хельсинки хотодо томо уласхоорондын мүрысөөн үнгэрһэн долоон хоногой эсэстэ түгэсэбэ. 49 килограмм хүрэтэр шэгнүүртэ Буряадаймнай урдаа хараха боксёр Батор Сагалуев түрүүлжэ гараа. Тэрэ гурба дахин ринг дээрэ гаража, бүхы уулзалгануудаа шүүһэн байна. Хоёр жэл урда тээ Батор мүн лэ Хельсинкидэ илалта туйлаа бэлэй.
***
1956 оной декабриин 1-дэ Буряадаймнай аза талаан ехэтэй боксёр Владимир Сафронов Мельбурн хотодо Олимпиин наадануудта чемпионой нэрэ зэргэдэ хүртөө бэлэй. Тэрэ гэһээр аяар 60 жэл болохоо байна. Энэ ушараар республика доторнай олон тоото хэмжээ ябуулганууд хараалагданхай.
Ерэхэ зун “Байкал” гэһэн бүхэроссиин мүрысөөн Владимир Сафроновто зорюулагдаха юм. Гэхэтэй хамта, Дурасхаалай самбар, Боксын музей нээгдэхээр түсэблэгдэнхэй. Апрель һарада бүхы һургуулинуудта нээмэл хэшээлнүүдтэ суута боксёр тухай хөөрөөн болохо юм.
Армспорт
Гар дээрэ тулалдаагаар Россиин чемпионат мартын 19-20 үдэрнүүдтэ Московско можын Раменское хотодо үнгэргэгдэбэ. Эндэ Буряадай тамиршад гурбан медаль абажа шадаа.
80 килограммһаа үлүү шэгнүүртэ эхэнэрнүүдэй дунда Валентина Федосеева баруун гар дээрэ тулалдаад, алтан медальда хүртөө. Харин зүн гараараа тэрэ мүнгэн медаль абаба.
Эрэшүүлэй дунда зүн гараараа Анатолий Ощепков хүрэл медальда хүртөө.
Шатар
Үнгэрһэн амаралтын үдэрнүүдтэ Улаан-Үдэдэ “Сагаан тэргэ” (Белая ладья) гэһэн фестивалиин уласай шата эмхидхэгдэбэ. Энэ жэл команданууд дээдэ болон нэгэдэхи лигэнүүдтэ наада үнгэргөө.
Улаан-Үдэ хотын 14-дэхи гимназиин шатаршад түрүүлжэ гараа. Екатерина Гыргенова, Михаил Монхоров, Аюр Дымчиков болон Арюна Баирова бүхы дээрээ 20 очко абаад, чемпионууд болобо. Шангай һууринуудые 3-дахи гимназиин болон 49-дэхи һургуулиин шатаршад эзэлээ.
Өөр өөрын хюлгэнүүд дээрэ Алексей Янгутов (3-дахи гимнази), Чимита Шарапова (33-дахи гимнази), Кирилл Базырцыренов (49-дэхи һургуули) болон Арюна Баирова (14-дэхи гимнази) түрүү һууринуудые эзэлээ.
Дээдэ лигэдэ наадаһан 12 командануудай дүрбэниинь хүдөө аймагуудай байгаа юм.
Нэгэдэхи лигэдэ 56-дахи һургуулиин шабинар түрүүлжэ гараа. 47-дохи һургуулиин болон 3-дахи гимназиин команданууд шангай һууринуудые эзэлээ.
Даам наадалга
“Чудо шашки” гэһэн бүхэроссиин фестиваль Улаан-Үдэ хотонуудай һурагшадай дунда эмхидхэгдэбэ. Эндэ шалгарһан дүрбэн команда республиканска хэмжээнэй мүрысөөндэ хабаадаха эрхэдэ хүртөө. Бүхы дээрээ 17 команда хара-сагаан хюлгэ дээрэ уулзаа.
32-дохи һургуулиин шабинар Улаан-Үдын чемпионууд болобо. Николай Шапошников, Даниил Адамский, Катя Новикова болон Лена Суворова чемпионой командын түлөө наадаа. 28-дахи санаторно-һургуулиин хүбүүд, басагад хоёрдохи шангай һуури эзэлээ. Харин 55-дахи һургуулиин үхибүүд гурбадахи һуурида гараба.
Ушу
Буряадаймнай тамиршад Сибириин тойрогой суглуулагдамал командын бүридэлдэ олоор оруулагдажа, Россиин чемпионадта дахинаа амжалтатайгаар хабаадаба. Тэдэ 29 медальтай гэртээ бусаба.
15-17 наһатай эдиршүүлэй дунда Анна Шатаева гурба дахин Россиин чемпионой нэрэ зэргэдэ хүртөө. Энэл наһанай бүлэгтэ Анна Кучерявенко болон Виктория Суборова нэгэ дахин чемпионууд болоо.
Татьяна Багаева, Альбина Арамхиева гэгшэд 11-14 наһанай бүлэгтэ чемпионуудай нэрэ зэргэдэ хүртөө. Мүн тиихэдэ ехэшүүлэй дунда Владимир Максимов дахинаа чемпион болоо.
Борис БАЛДАНОВ бэлдэбэ.
