935
Мүнөөдэрэйнгөө дугаарта 1970-аад, 1990-ээд онуудай нэгэ- нэгэ жэл абан, хүнгэн атлетикын түүхэ абажа, хөөрөөгөө түгэсхэхэмнай. Майн 2-то Соведүүдэй талмай дээрэ 70-дахияа эмхидхэгдэхэ гүйлдөөнэй заншалта найр нааданда бүхы уншагшадаа урижа байһанаа мэдүүлнэбди.
1977 он. Автор Бадма Цыремпилов.
... - Совет хэблэлэй, Агууехэ Октябриин 60 жэлэй ойдо зорюулагдаһан заншалта урилдаанда үнгэрэгшэ жэлэйхидэл адли олон спортсменүүд хабаадаба. Тоолон хэлэхэдэ, Улаан-Үдын предприяти, һургуули болон институдуудһаа гадна, Яруунын, Загарайн аймагуудай, Улаан-Үдын леспромхозой түлөөлэгшэд тэдээн соо бии. Энэнь һайшаалтай гээшэ. Хамтадаа мянга табан зуунһаа дээшэ спортсменүүд урилдаанда хабаадаа, - гэжэ мүрысөөнэй ахамад судья, Доржи Банзаровай нэрэмжэтэ багшанарай институдай физическэ хүмүүжүүлгын кафедрые даагша В.Л.Балдаев хөөрэнэ...
... Заншалта ёһоор, эгээл түрүүлэн найман жэлэй һургуулинуудай эдир басагад урилдаанда табигдаба... Урилдаанай эхилһээр, арбаад минута болоод байхада, хоёр басагад фиништэ дүтэлжэ ябаба. Эдэнэрэй энгэртэ “11”, “8” гэһэн номернууд харагдана. Эндэ 11 номертой басаганиинь түрүүлэн фиништэ хүрэжэ, сагаан торгон лентэ таһалбал даа. Энэмнай шэхэ хатуу үхибүүдэй интернат- һургуулиин һурагша Нина Бадмаева байба...
... Жэл бүри үнгэргэгдэдэг заншалта энэ урилдаанда Зүүн Сибириин технологическа институдай команда огто хабаадабагүй. Эдэнэр политическэ удха шанартай энэ мүрысөөндэ хоёрдохи жэлээ хабаадалсаагүй байһаниинь гайхалтай...
1995 он. Автор Бадма Цыремпилов.
... Зунай спортын хаһа нээһэн заншалта урилдаан байгша ондо Илалтын 50 жэлэй ойдо зорюулагдаа...
... Апрелиин 30-да үглөөнһөө баруун хойноһоо секундын 18-20 метр хүсэтэйгөөр һалхилжа, хүнгэнөөр хубсалһан хүн зондо, спортсменүүдтэ хүйтэншэг байба. Тиигээшье һаань, сагай ямаршье уларилда үнгэрэгдэхэ һэн тула мүрысөөн эхилбэ...
...Манай эстафетэдэ жэл бүри хабаадалсажа, командаяа түрүү һуурида гаргалсадаг Сергей Федотов, Юрий Чижов, Наталья Соломинская, Татьяна Позднякова, Надежда Мироманова болон бусадые эндэ түрүүлэн дурдаха дуран хүрэнэ...
...- Манай командын гэшүүд энэ урилдаанда илажа гараха эрмэлзэлдэ үнинэй абтанхай. Юуб гэхэдэ, манай багша Надежда Васильевна Никифорова хэшээлэй һүүлдэ бидэнэрээ газаахи талмай дээрэ гаргажа, таһалгаряагүй урилдаа үнгэргэжэ, харуулһан сагыемнай үшөө һайн болгохо эрилтэ табидаг, заабарилдаг хүн юм, - гэжэ түрүүшын ээлжээндэ Аня Трофимова омогорхоо бэлэй...
... Табадахи ээлжээндэ урилдаанда табигдаһан техникум, училищинуудай дунда жэл бүри болодог шанга тулалдаанда үбсүүндээ 27, 43, 5 гэһэн номертой басагад түрүүшын гурбан һуури буляалдажа ябана. Эдэнэрэй хэниинь түрүүлжэ ерэгшэ ааб, хаража үзэел даа, - гээд ахамад судья В.Л.Балдаев ГАИ-гай машина сооһоо “Прогресс” кинотеатрай захаһаа микрофоноор дуулгана...
“Буряад үнэн” сониной архив сооһоо Борис БАЛДАНОВ бэлдэбэ
