​Жибзема Дамбаевагай үшөө нэгэ амжалта

Венгриин Хевиц хотодо залуушуулай дунда Европын Кубогай нэгэдэхи шата майн 2-7-ной үдэрнүүдтэ үнгэргэгдэбэ. Эндэ Буряадаймнай тамиршад Россиин суглуулагдамал командын бүридэлдэ оруулагдажа, хоёр медальда хүртэбэ.

Эдэ хоёр медаль Жибзема Дамбаева абаа гээд, абаһаар лэ хэлэхэ шухала. Тэрэ хубиин мүрысөөндэ хоёрдохи һуурида гараа. Финальна спаррингда Буряадаймнай басаган Саха-Яхад Республикын Розалина Тимофееватай уулзаад, 2:6 гэһэн тоотойгоор диилдэбэ.

Харин командна тоосоондо энэ наһанай басагадай команда түрүүлжэ гараа. Жибзема Дамбаева, Розалина Тимофеева ба Забайкалиин хизаарай Бальжин Доржиева гэгшэд финалда Франциин командые 5:1 гэһэн тоотойгоор шүүһэн байна.

Бүхы дээрээ Россиин суглуулагдамал командын бүридэлдэ Буряадаймнай табан залуу харбаашад оролсоо. Хевицтэ мүрысөөн хоёр наһанай бүлэгтэ (1996-1998, 1999-2002 онууд) болоһон байна.

Эдэ үдэрнүүдтэ Россиин ехэшүүлэй суглуулагдамал команда Колумбиин ниислэл болохо Медельин хотодо Дэлхэйн Кубогта хүртэхын түлөө мүрысөөнэй 2-дохи шатада хабаадажа байна.