​Буряадай ушуистнар дахинаа гайхуулаа

Москва хотодо үнгэргэгдэһэн Европын чемпионадта 21 гүрэнэй 300 гаран тамиршад хабаадаба. Россиин суглуулагдамал командын бүридэлдэ оролсоһон хүбүүд, басагад олон шангай һууринуудые эзэлбэ, түрүүлжэ гарагшад тэдэнэй тоодо мүн лэ бии.

Ушугай дэлхэйн түүхэдэ ородог энэ мүрысөөн Орос гүрэнэй ниислэлдэ нэгэтэ бэшэ үнгэргэгдэһэн байна. Энэ удаа тус хэмжээ ябуулга Москва хотодо ушугай шэнэ ордондо болоо гээд хэлэхэ хэрэгтэй. Бүхы манай гүрэнэй үндэр нэрэ зэргэтэй, ургажа ябаа залуу бургааһадые дүй дүршэлтэй болгохо гэһэн зорилготойгоор Ушугай ордон баригдаа гээшэ. Энэ томо, асари ехэ, олоной ухаанда ойлгогдоогүй гайхамшагта спортын танхимай хибэс дээрэ Буряадаймнай хүбүүд, басагадай шалгарһаниинь гайхалгүй.

“Алтан Луу” гэһэн манай республикын урдаа хараха спортын клубай үхибүүд тус чемпионадта ялас гэмэ амжалта туйлаба. Буряад Уласай Арадай Хуралай депутат Игорь Марковецэй ударидалга доро һорилго хэжэ байһан залуу һоригшод Анастасия Ворошнина, Светлана Фомицкая Европын чемпионадта дахинаа шалгарба. Тиигэжэ тэдэ 8 алтан, 5 мүнгэн болон 3 хүрэл медаль абажа шадаа.

Анна Шатаевагай гурбан алтан медаль абаһаниие тэмдэглэхэ хэрэгтэй. “Ушу-таолу” болон заншалта ушугай программаар тэрэ түрүүлһэн байна. Мүн тиихэдэ Анна мүнгэн медаль абаа.

Тус мүрысөөндэ Европын илагшадай тоодо Алина Фёдорова, Даяна Дармаева, Зорикто Баяртуев болон Аэлита Чагдурова гэгшэд оролсоо. Мүн тиихэдэ суута ушуист Владимир Максимов түрүүлжэ гараа. Хэды дахин Владимир Европын чемпионадта түрүүлээб гэжэ өөрөөшье тооложо шаданагүй.

Тамиршад Татьяна Багаева, Никита Васильев болон Анна Леонова гэгшэд шангай һууринуудые эзэлээ.