​Буряад хүбүүд, басагадай ялас гэмэ амжалта

Монголой ниислэл Улаан-Баатар хотодо июниин 1-6-най үдэрнүүдтэ оюутадай дунда дэлхэйн чемпионат боложо түгэсэбэ. Буряад Уласай Татьяна Бильтрикова Россиин суглуулагдамал командын бүридэлдэ оруулагдажа, шангай гурбадахи һуури эзэлээ.

Бүхы дээрэ Буряад Уласай, Забайкалиин хизаарай, Московско можын, Ямало-Ненецкэ автономито тойрогой түлөө харбадаг буряад уг гарбалтай хүбүүд, басагад энэ дэлхэйн мүрысөөндэ үшөө нэгэ алтан, хоёр мүнгэн, хоёр хүрэл медальда хүртөө гээд баярламаар.

Нэн түрүүн Буряадайнгаа тамиршад тухай хөөрэе. Татьяна Бильтрикова классическа һуршаар оролсоходоо, командна тоосоондо Россиин түлөө Забайкалиин хизаарай Саяна Цыремпилова болон Арюна Жаргалова гэгшэдтэй харбаа. Гурбадахи һууриин түлөө тэдэ япон басагадые 6:0 гэһэн тоотойгоор илажа, хүрэл медаль абаба.

Блочно һуршаар харбалгада Оюна Болотова командна тоосоондо хоёрдохи шангай һуури эзэлээ. Тэрэ Наталья Авдеева болон Диана Тонтоеватай хамта финальна уулзалгада Индиин командада шүүгдэбэ. Диана Тонтоева хадаа Московско можын буряад уг гарбалтай тамиршан юм.

Хубиин тоосоондо Забайкалиин хизаарай тамиршад ялас гэмэ үндэр дүн харуулба. Универсиадын чемпионой нэрэ зэргэдэ Галсан Базаржапов хүртөө. Арюна Жаргалова болон Болот Цыбжитов гэгшэд гурбадахи һуури эзэлээ.

Үшөө нэгэ медаль блочно һуршаар харбадаг Россиин суглуулагдамал команда абажа шадаа. Буряадһаа уг гарбалтай Виктор Калашников болон Чингис Ринчино болон Забайкалиин хизаарай Александр Дамбаев гэгшэд мүнгэн медаляар урмашуулагдаа.

Һур харбалгаар июниин 12-17-ной үдэрнүүдтэ Турциин Анталида дэлхэйн Кубогта хүртэхын түлөө мүрысөөнэй гурбадахи шата үнгэрхэнь гээшэ. Олимпиин наадануудта хабаадаха һүүлшын эрхэнүүд олгогдохо. Россиин эрэшүүл Риодо ошохо үшөө нэгэшье путёвко үгы байна бшуу.