​Шадамар бэрхэ болоһоноо Даба-Цырен гэршэлбэ

Буряад Уласай эрэмдэг бэетэй хүн зон элдэб спортын зүйлөөр бэеэ һорижо эхилхэдэнь, тон баярламаар. Һүүлэй хэдэн жэлдэ 60-дахи тусхай һургуулиин шабинар “хабсагай өөдэ абиралга” (скалолазание) шэлэн абажа, яһала үрэ дүн харуулжа эхилээ бшуу.

2015 оной һүүл багаар Аяна Балданжапова болон Даба-Цырен Тушкаев гэгшэд Россиин чемпионадта мүнгэн медальнуудта хүртөө һэн. Харин энэ үдэрнүүдтэ шадамар бэрхэ болоһоноо Даба-Цырен дахинаа гэршэлбэ. Тэрэ Тюмень хотодо болоһон Россиин Кубогта хүртэхын түлөө түрүүлжэ гараа.

- Тюмень хотодо тус мүрысөөн хүнгэн атлетикын шэнэ манеж соо болоһон байна. Тэндэхи нэгэ таладань тон ехэ, уласхоорондын хэмжээндэ таарама хана бодхоогдонхой байгаа. Харин манай Улаан-Үдэ хотодо энэ ханын хахадыньшье үгы, - гэжэ 60-дахи һургуулиин багша Татьяна Намагуруева хөөрэнэ.

Даба-Цырен энэ мүрысөөндэ хана дээрэ түргөөр абиралгада хоёрдохи шангай һуури эзэлээ. Мүн хүндэ тала барихадань, түрүү һуури үгтөө. Тиихэдэ многоборидо тэрэ Россиин Кубогта хүртөө. Энэ мүрысөөндэ 19 эрэмдэг бэетэй тамиршад хабаадалсаа гээд хэлэлтэй. Мүн тиихэдэ Россиин эгээл шанга тамиршад өөһэдынгөө мүрысөөндэ суглараа.