​Оросой һур харбалгын түрүүшүүлэй тоодо

Буряад Уласта һур харбалгын хүгжэлтэдэ горитой ехэ нүлөө үзүүлһэн һоригшо Константин Дашиевич Эрдыниев болон тэрэнэй шаби, суута Бальжинима Цыремпилов хоёр Москва хотодо Россиин ниитын шангуудта хүртэбэ.

Орос гүрэнэй Захиргаанай зууршалгаар буудалгын спортын зүйлнүүдтэ анхарал хандуулхын түлөө эдэ шангууд барюулагдаа гээд, хэлэхэ шухала. Биатлон, арбаледээр буудалга, сагаалса буудалга, практическа буудалга болон бусад зүйлнүүдые өөдэнь үргэжэ ябаһан хүн зон шан абаа гээшэ. Һур харбагшадые энэ ушараар мартаагүйдэнь һайшаалтай. Орос гүрэнэй түрүүшын иимэ шагнал болобо гээшэ.

Буряад Уласай мэдээжэ һоригшо Константин Дашиевич Эрдыниев олон жэлдэ эдиршүүлые бэлдэжэ, дэлхэйн спортын орьёлдо хүргэжэ ябана. - 35 жэл соо һоригшоор хүдэлнэб. Энэ хугасаа соо спортын гурбан габьяата мастер, уласхоорондын классай найман мастер, спортын 40 гаран мастернуудые бэлдээб. Мүнөө сагта Риодо болохо Олимпиадада хабаадахаяа минии шаби Инна Степанова бэлдэжэ байнхай. Тэрэ үрэ дүнтэйгөөр Бразили ошоод ерэхэ бэзэ гэжэ найданаб, - гээд баяр ёһололой суглаанай үедэ Константин Эрдыниев хэлээ.

Энэ үдэшэ Константин Эрдыниевтэ “Хүүгэдэй спорт хүгжөөһэнэй түлөө” гэһэн шан барюулагдаба.

Буряадай спортын урдаа хараха тамиршан, Олимпиин наадануудта дүрбэ дахин хабаадагша Бальжинима Цыремпилов тус һайндэртэ “Суута тамиршан” гэһэн нэрэ зэргэдэ хүртөө.

Автор: http://www.archery.su/ гэһэн сайтһаа абтаһан фото-зураг
Описание: Бальжинима Цыремпиловтэ шан барюулагдана

Буряад Уласһаа уг гарбалтай Валерий Лысенко мүнөө сагта Москвада ажаһуудаг. Тэрэ оло дахин бүхэроссиин болон уласхоорондын талмайнууд дээрэ амжалта туйлаһан намтартай. Валерий Лысенко Улаан-Үдэдэ ажаһуухадаа, Леонид Ширапович Халудоровай һорилго доро бэлэдхэл хэгшэ бэлэй. Харин мүнөө өөрөө һоригшо болоод ябахадаа, Оросой бэрхэ һоригшодой тоодо оролсожо, тусхай шан энэ үдэшэ абаа.

Забайкалиин хизаарай һур харбалгын федераци баһа шалгаржа, шанда хүртөө.