​"Эрхыдээ эмтэй, долёобортоо домтой" шатаршын шангуудта хүртэхөө шамдыт

Июниин 11-12-ой үдэрнүүдтэ хүдөө нютагта ажаһуудаг шатаршадай дунда заншалта болоһон уласай мүрысөөн үнгэргэгдэхэнь. Иволгинск тосхондо болохо сагаан-хара хюлгэнүүд дээрэхи шанга тулалдаанууд баярай оршон байдалда эмхидхэгдэхэ юм. Ушар гэхэдэ, мэдээжэ шатаршан болон даамшан Людмила Данзановна Абзаевагай түрэһэн үдэрэйнь ойн баярта зорюулагдаха.

Людмила Данзановна РСФСР-эй арадуудай Спартакиадада тойрогой чемпион боложо шадаа. Энэ мүрысөөн аяар холын 1967 ондо Томск хотодо үнгэргэгдөө бэлэй. 60-аад онуудта Эрхүү хотодо медицинскэ институдта һуража байхадаа, Эрхүү можын чемпионка болоһон байна. Тэрэл сагта Эрхүү болон Улаан-Баатар хотонуудай нүхэсэмэл наадануудта хабаадалсажа, заал һаа илалтануудые туйладаг һэн. Буряадай АССР-эй “Урожай” спортын бүлгэмэй долоо дахин чемпион, “Спартак” гэһэн спортын бүлгэмэй хоёр дахин чемпион гэһэн нэрэ зэргэнүүдтэй юм.

Людмила Данзановна Абзаева 1946 оной июниин 1-дэ Түнхэнэй аймагай Хэрэн һууринда Данзан Шойсоронович ба Дари Сырендоржиевна Будаевтанай гэр бүлэдэ түрөө һэн. Эрхүүгэй медицинскэ институдай фармацевтическэ факультет дүүргээд, Түнхэнэй аймагта, Улаан-Үдэ хотын аптекэнүүдтэ хүдэлөө. Людмила Данзановнагай ударидалга доро Улаан-Үдын Восточный һууринда 85-дахи аптекэ бодхоогдоо. Наһанайнгаа амаралтада гарахынгаа урда тээ тэрэ Зүүн зүгэй медицинын түбтэ хүдэлөө. Дэлгүүрэй экономикын гүрэн доторнай тогтоходо, Буряад Уласта түрүүшын хубиин аптекэ нээһэн намтартай. Аяар 47 жэлэй хугасаа соо арад зоной элүүрые хамгаалгада үрэ дүнтэйгөөр хүдэлһэнэй түлөө олон тоото шагналнуудта хүртөө. Л.Д.Абзаевае “эрхыдээ эмтэй, долёобортоо домтой” тамиршан гэжэ дэмы хэлэнэгүй бшуу.

Залуу наһанһаа хойшо мүнөө болотор спортдо дуратай Людмила Данзановна шатар наадаяа хаяагүй юм. Тиигэжэ 2012 ондо Ивалгын дасанай дэргэдэ эмхидхэгдэдэг түргэн шатараар Россиин Кубогта хүртэхын түлөө ээлжээтэ шатада ветерануудай дунда түрүүлжэ гараа. Мүн даам наадалганда амжалтануудые туйлаһан байна.

Алексей Ильич Абзаев нүхэртэеэ Сэсэг, Дарима басагадые, Андрей хүбүүгээ “гарынь ганзагада, хүлынь дүрөөдэ” хүргөө. Табан аша зээнэртэй, хоёр гушанартай Людмила Данзановна ан-бун ажаһууна. Хүгшэн эжынгээ шатарай хэрэг Ирина Абзаева аша басаган болон Валерия Муманова гуша басаганиинь үргэлжэлүүлнэ.

70 наһанайнгаа дабаае Людмила Данзановнагай сагаан-хара хюлгэ дээрэ угтаһаниинь гайхалгүй. Июниин 11-12-ой үдэрнүүдтэ Иволгинск һууринай спортын ба соёлой комплекс соо хүдөөгэй шатаршадай дунда Буряад Уласай чемпионадай үнгэрхэ үедэ ойн баяраар һайхан үгэнүүд хэлэгдэхэ. Харин гол үйлэ хэрэг шанга тулалдаануудай үедэ болохоор хараалагдана.