​Ехэнхи шангууд Буряад Уласта хүртөө

Буряад Уласай эдир шатаршад Шэтэ хотодо үнгэргэгдэдэг регион хоорондын мүрысөөндэ шалгараа. Хара-сагаан хюлгэ дээрэ шанга тулалдаанууд 5-дахияа “Мегаполис” гэһэн спортын комплексын Кубогта хүртэхын түлөө болоно гэхэ хэрэгтэй.

Бүхы дээрээ Забайкалиин хизаарай болон Буряад Уласай 155 тамиршан наадаһан байна. Тэдэ 23 командын бүридэлдэ оролсоо. Эмхидхэгшэдэй хэлэһээр, мүнөө жэлэй мүрысөөндэ Эрхүү можын болон Монголой шатаршадай хабаадаагүйдэ харамтай.

Командна тоосоондо һүүлшын 11-дэхи тур түгэсэтэр, ямар команда түрүүлжэ гарахаб гэжэ мэдэгдээгүй байгаа. 43,5 очко абаһан Улаан-Үдын “Гевс” команда нэгэдэхи һуури эзэлжэ, Кубогта хүртэбэ. Аюр Балдаров, Дандар Шобоев, Алексей Янгутов, Эрдэм Хубукшанов болон Сойжина Комиссарова гэгшэд чемпионуудай түлөө наадаа. Шэтэ хотын “Забайкалье” команда мүнгэн медаль абаһан байна. "Огненные драконы” гэһэн Улаан-Үдын үшөө нэгэ команда гурбадахи һуури эзэлбэ. Энэ командын бүридэлдэ Дашанима Дашдорж, Санжи Мункодугаров, Кирилл Базырцыренов, Аюр Аюшиев болон Арюна Пронькина гэгшэд оруулагдаа.

Хубиин тоосоондо хүбүүдэй дунда түрүү һуури эзэлхын түлөө Буряадай хоёр шатарша тэмсээ. 10 очко абаһан Дандар Шобоев болон Аюр Балдаров гэгшэд шангай нэгэдэхи-хоёрдохи һууринуудта гараа. Эндэ гол шан Дандар Шобоевто хүртөө. Гурбадахи һуурида 9 очко абаһан Алексей Янгутов гаража шадаа.

Басагадай дунда Шэтын Ксения Абашеева түрүүлһэн байна. Шангай хоёрдохи һуури Улаан-Үдэ хотын Арюна Пронькина эзэлбэ.