​Олимпиадын дүтэлхэ бүри һайн дүн харуулна

Һур харбалгаар Орос гүрэниие Риодо үнгэргэгдэхэ Олимпиин наадануудта ганса эхэнэрнүүдэй команда түлөөлхэнь.

Июниин 15-19-эй үдэрнүүдтэ Турциин Анталида дэлхэйн Кубогта хүртэхын түлөө гурбадахи шата боложо түгэсэбэ. Тус мүрысөөнэй үедэ Олимпиин наадануудта хабаадахын түлөө һүүлшын путёвконууд хубаарилагдаа. Эндэ Оросой бүридэмэл команда бирагүйдөө. Московско можын Александр Кожин, Свердловско можын Виталий Попов, Буряадай Баир Цыбекдоржиев гэгшэд түрүүшын шатада Белоруссиин эрэшүүлые диилэһэн аад, дүрбэлжэн финалай уулзалгада Индонезидэ шүүгдээ. Тиигэжэ Оросой эрэшүүл Олимпиин наадануудта хабаадахагүй болоно.

Үшөө 2015 ондо дэлхэйн чемпионадта түрүүлжэ гараад, Риодо ошохо эрхэтэй болоһон эхэнэрнүүднай мүрысөөнһөө мүрысөөн болотор һайн дүнгүүдые харуулжа эхилбэ. Свердловско можын Ксения Перова, Үбэр-Байгалай хизаарай Туяна Дашидоржиева болон Буряадаймнай Инна Степанова гэгшэд Европын чемпионадта 6-дахи һуурида гараа. Дэлхэйн Кубогай түрүүшын шатада тэдэмнай хүрэл медаль абажа шадаа. Харин мүнөөнэй мүрысөөндэ хоёрдохи шангай һуури эзэлжэ, мүнгэн медаляар урмашуулагдаа.

Турцида Оросой суглуулагдамал команда Колумбиин (6:2), Польшын (6:2) болон Энэдхэгэй (5:1) эхэнэрнүүдые илажа гараа. Харин һүүлшын уулзалгада Урда Солонгосой басагадта 2:6 гэһэн тоотойгоор шүүгдэбэ. Иигэжэ Урда Солонгосой тамиршад бүхы дэлхэй дээрэхи һур харбалгада хэн эзэн бэ гэжэ дахинаа харуулба. Гэхэтэй хамта, урда солонгосойхид дэлхэйн рекорд табиба. Командна тоосооной бүридэлдэ энэ тоо 2045 очко болотор үргэбэ. Энэ дүн Чои Мисун, Ки Бо Бэ и Чан Хе Джин гэгшэд харуулаа гээд хэлэхэ шухала.

Хубиин тоосоондо Ксения Перова хоёрдохи шангай һуури эзэлбэ. Бусад тамиршаднай һайн дүн харуулжа шадаагүй.

Россиин суглуулагдамал командын Олимпиин наадануудта тон үрэ дүнтэйгөөр бэлдэжэ байһаниинь һайшаалтай.