​Азиин хүүгэдэй аятай наадан

Эдэ үдэрнүүдтэ Якутск хотодо “Азиин хүүгэд” гэһэн уласхоорондын спортын нааданууд боложо байна. 35 гүрэнэй 2600 гаран хабаадагшадай дунда Буряад Уласай 16 эдиршүүл хабаадана гээшэ. Тэдэ Сибириин федеральна тойрогой суглуулагдамал командын бүридэлдэ оруулагданхай. Июлиин 6-10 үдэрнүүдтэ Буряадаймнай хүбүүд, басагад 4 алтан, 1 мүнгэн болон 3 хүрэл медальнуудые абажа шадаа.

“Азиин хүүгэд” гэһэн уласхоорондын спортын нааданууд анха түрүүшынхиеэ 1996 онһоо Якутск хотодо эмхидхэгдэжэ эхилэнхэй. Олимпиин хүдэлөөнэй байгуулагдаһаар 100 жэлэй ойдо түрүүшын нааданууд зорюулагдаһан түүхэтэй. Олимпиин халаанай дүрбэн жэлэй нэгэ дахин болодог заншалтай.

2012 ондо тус наадануудта 27 гүрэнэй түлөөлэгшэд хабаадаа бэлэй. Харин мүнөө Якутск хотодо ерэһэн эдиршүүлэй тоо эрид дээшэлээ. Бүхы дээрээ тэдэ спортын 22 зүйлөөр мүрысэнэ.

Нааданай түрүүшын үдэрнүүдтэ эдир барилдаашаднай тон һайн дүн харуулһан байна. 54 килограмм хүрэтэр шэгнүүртэ Чимит Жамсаранов түрүүлжэ гараа. Һүүлшын уулзалгада тэрэ Казахстанай тамиршаниие шүүжэ гараа. 50 килограмм хүрэтэр шэгнүүртэ Алдар Мункуев гурбадахи һуурида гараа.

Үшөө олон медальнуудые шэхэ хатуушуулай дунда мүрысэһэн барилдааша хүбүүд асараа. Сергей Евтюгин нааданай чемпион боложо шадаа. Тэрэ финалда Казахстанай тамиршаниие шүүжэ гараа. Хүрэл медаль абаһан Михаил Прокушев ганса хибэсэй эзэндэ шүүгдэжэ, мүнгэн медаляар урмашуулагдаа. Георгий Гончаров гурбадахи шангай һуури эзэлээ. Шэхэ хатуу барилдааша хүбүүдые Баяр Батомункуев, Сырен-Доржо Андренов болон Гэрэл Цындымеев бэрхэ һоригшод бэлдээ гээд хэлэхэ шухала.

Һур харбагшаднай баһа медальтайгаар Олонхо газарһаа гэртээ бусахань. Руслан Серебряков хүбүүдэй дунда түрүүлжэ гараһан байна. Басагадай дунда мүрысөөндэ Үбэр-Байгалай хизаарай Туяна Будожапова нэгэдэхи һуурида гараа.

Сагаалса буудалгаар Яна Енина баһа алтан медальда хүртөө. Пистоледээр буудахадаа, Яна 191,2 очко абаһан байна. Хоёрдохи шангай һуурида гараһан Казахстанай тамиршан аяар 1,2 очко бага абаа.

Дзюдо барилдаагаар Александра Ковалёва 44 килограмм хүрэтэр шэгнүүртэ гурбадахи шангай һуурида гаража, спортдо дуратайшуулые баясуулаа.

«Азиин хүүгэд” гэһэн наадан июлиин 17-до түгэсэхэ. Буряадаймнай тамиршадай тэрэ болотор туйлагдаһан амжалтануудтай хүндэтэ уншагшадаа удаадахи дугаарта танилсуулхабди.