​"Азиин хүүгэд" Буряадта бүри дүтэ болохонь

Үнгэрһэн долоон хоногой эсэстэ Якутск хотодо “Азиин хүүгэд” гэһэн уласхоорондын асари томо наадан түгэсэбэ. Июлиин 11-16-най үдэрнүүдтэ Сибириин федеральна тойрогой суглуулагдамал командын бүридэлдэ оруулагдаһан Буряад Уласай хүбүүд, басагад хоёр алтан, нэгэ мүнгэн медальнуудые абажа шадаба. Нааданай түрүүшын үдэрнүүдтэ манай үхибүүд 8 шангай һууринуудта гараа гэжэ урдахи дугаартаа мэдээсээ һэмди. Харин бүхы мүрысөөнүүдэй дүнгөөр 11 медаль Буряадта ерээ.

Сагаалса буудалгаар Улаан-Үдэ хотын 1-дэхи һургуулиин шаби Анастасия Деревягина бага калибрай винтовкоор буудахадаа, түрүү һуури эзэлбэ. Шанга буудагша, өөрын наһанай дунда Азиин чемпион боложо шадаһан Монголой Эрдэнэчулуун Энхмааһаа Буряадай тамиршан мэргэн байшаба.

Автор: Борис Балданов
Описание: Буряадай мэргэн Анастасия Деревягина

- Тус мүрысөөндэ тиимэшье һайнаар бэлдээгүйб. Юуб гэхэдэ, арбаледээр харбалгаар мүрысөөнүүдтэ хабаадажа байһанаа эндэ ерээб. Мүрысөөнэй үедэ ехэ һанаагаа зобооб, түргөөр лэ түгэсэхөө яанаб гэжэ һанан байгааб. Тиимэһээ илалта туйлахаб гэжэ оройдоошье һанаагүйб, - гэжэ Анастасия Деревягина һанамжаараа Яхадай сурбалжалагшадтай хубаалдаа.

Саха-Яхадай арадай “хапсагай” гэһэн барилдаагаар Буряадай түлөөлэгшэ Буянто Банзаракцаев өөрын шэгнүүртэ нэгэдэхи һуури эзэлһэн байна. Тэрэ 70 килограмм хүрэтэр барилдаашадай дунда хибэс дээрэ гараа. Түрүү һуури эзэлхын түлөө тулалдаанда Буянто Саха-Яхадай түлөөлэгшэ Руслан Максимовтай уулзаа. “Буряадай тамиршан хоёр дахин хүлдэнь орожо, дээрээ үргөөд, тон гоёор хаяжархёо” гэжэ Саха-Яхадай сурбалжалагшад энэ уулзалга тухай бэшэһэн байна.

Дзюдо барилдаагаар Буряад Уласай Кристина Шогеридзе 70 килограмм хүрэтэр шэгнүүртэ мүнгэн медальда хүртөө. Тэрэ Ураалай федеральна тойрогой командын гэшүүн Ангелина Курбатовада булигдаа. Дзюдо барилдаагаар һоригшо, өөрөө Саха-Яхадта ошожо судья байһан Дмитрий Никулинай хэлэһээр, Кристина хэды һайн барилдабашье, мүрысөөндэ хабаадалгын дүй дүршэл багадаа.

Нааданай дүнгөөр Сибириин федеральна тойрогой тамиршад эгээл олон медальнуудта хүртөө. Тэдэ 49 алтан, 29 мүнгэн болон 36 хүрэл медаль абаа. Командна тоосоондо Монголой хүбүүд, басагад 48 медальда хүртөөд, табадахи һууринда гараа.

Удаадахи, 7-дохи нааданууд Монголой ниислэл Улаан-Баатар хотодо 2020 ондо болохоор хараалагдана. Боксоор 2009 оной дэлхэйн чемпион, Бээжэн хотодохи Олимпиадын мүнгэн медаль абагша Пурэвдоржийн Сэрдамбада “Азиин хүүгэд” гэһэн нааданай туг дамжуулагдаа.