​Бэеэ һорин, аятайгаар амарна

Байгал далайн эрьедэ дүшэ гаран жэлдэ тамирша хүүгэд зунайнгаа амаралта аятайгаар үнгэргэнэ. Мүнөөшье жэл хүбүүд, басагад “Энхалук” гэһэн спортын болон элүүржүүлгын лагерьта урданайхиһаа үлүү байдалда һорилго гараба гээшэ. “Энхалук” лагериин хүтэлбэрилэгшэ Базыр Дашиевич Цыреновэй хэлэһээр, эндэхи зарим байшангууд һэльбэн шэнэлэгдээ.

- Манай лагериин дэргэдэхи 10 кемпинг соо дулаан уһан оруулагдаа, душ хэгдээ. Тиихэдэ дулаан оёор дэлгэгдээ. Энээниие сагай эрилтэдэ харюусама болгожо байнабди, - гээд Базыр Дашиевич баяраараа хубаалдана. – Эндэмнай тамирша үхибүүд амарна бшуу. Хэдэн жэл соо тусхай талмай бэлдээбди. Энэ хабар тэрээнээ хушалтатай болгоһондоо тэһэ баярланабди. Мүн тиихэдэ 12 метр утатай, 3 зүргэтэй бассейн хэдэн үдэрһөө ашаглалда тушаахамнай.

Зунай халаан тус лагерьта июниин 9-дэ эхилээ. Тхэквондогоор бэеэ һоридог 15О хүбүүд, басагад 1О үдэрэй һорилго гараа. Удаань нэгэдэхи халаан эхилжэ, столой теннис, шорт-трек, тамаралга, фитнес-аэробика гэгшэ спортын зүйлнүүдээр бэеэ һоридог 17О үхибүүд амараа.

Тэдэнэй хажуугаар эдиршүүлэй дунда Буряад Уласай суглуулагдамал команда һорилгын хэмжээ ябуулга эмхидхээ. Эндэ һорилго гараад, асари томо “Азиин хүүгэд” уласхоорондын мүрысөөндэ хоёр хүбүүд ялас гэмэ амжалта туйлаа. Буянто Банзаракцаев Яхадай “хапсагай” барилдаанда 70 килограмм хүрэтэр шэгнүүртэ түрүүлһэн байна. Харин Алдар Мункуев сүлөөтэ барилдаагаар гурбадахи һуури байна.

Хоёрдохи халаанда барилдаашад, һур харбагшад, боксёрнууд амарна. Тиихэдэ сүлөөтэ барилдаагаар Буряад Уласай басагадай суглуулагдамал команда һорилго хэжэ байнхай.

Бүхы халаануудта үхибүүдтэй тусхайгаар бэлэдхэгдэһэн вожатанууд хүдэлһэн байна. Тэдэ хүбүүд, басагадтай үдэр бүри һонирхолтой хэмжээ ябуулгануудые үнгэргэнэ. Тэдэнэй нэгэн гэхэдэ, Буряадай гүрэнэй дээдэ һургуулиин Зүүн зүгэй институдай нэгэдэхи курс дүүргэгшэ Ирина Аханаева болоно.

Автор: Борис Балданов
Описание: Вожатануудай хүмүүжүүлгэ үрэ дүнтэй (Ирина Аханаева баруун гарһаа)

- Хабар бидэндэ вожатын һургуулида һурахыемнай дурадхаа. Тэндэ олон юумэ мэдэжэ абааб. “Энхалук” лагерьта дэмы ерээгүйб. Юуб гэхэдэ, би өөрөөшье һур харбалгаар бэеэ һоригшоб, - гэжэ Ирина Аханаева хөөрэнэ. – Эндэ амардаг хүүгэд ехээр һорилго гарана. Ганса һорилго хэжэл байхагүйн түлөө бидэ, вожатанууд, элдэб юумэ зохёожо, үхибүүдые һамааруулнабди. Манай 4-дэхи отрядай бэлдэһэн акробатическа хатар “Алдарай минута” гэһэн хэмжээ ябуулгада түрүү һуури эзэлээ. Бүхы үхибүүд аза талаантай байжа, иимэ дүн харуулаабди.

Автор: Борис Балданов
Описание: Ганса һорилго хээд байхагүйн тулада

Хэжэнгын аймагһаа ерэһэн Сергей Корнилов хоёр жэлэй хугасаа соо боксоор бэеэ һорино. Оройдоол 9 наһатай хүбүүн хоёр мүрысөөндэ хабаадаад, шангай һуури эзэлһэн байна.

- Энэ лагерьта түрүүшынхиеэ амаржа байнаб. Аргагүй һонирхолтойгоор үдэрнүүд үнгэрнэ, айхабтар гоёор хооллуулна. Мүн Байгалай уһанда ороходоо, ехэ баярланаб, - гэжэ Сергей Корнилов хөөрэнэ.

“Энхалук” гэһэн лагериин Интернет соохи тусхай хуудаһанда иимэрхүү баярай үгэнүүдые олоор олохот.