1236
Үсэгэлдэр, 2016 оной августын 16-най (ямар удха ехэтэй тоонууд бэ) үглөө Улаан-Үдэ хотын аэропорт дээрэ ехэ хүлгөөтэй байба. Буряад Уласаймнай газар дэбисхэртэ үни удаан хүлеэгдэһэн Олимпиин наадануудай мүнгэн медаль хүрэжэ ерэбэ. Тэрэниие буряад угсаатанай урдаа хараха гоо дангина Инна Степанова асараа.
Энэ үглөөгүүр аэропортдо 100 гаран хүн Инные угтахаяа ерээ. Оройдоол 15 минута соо самоледой гээгдэн буухада, мүнгэн медаль абаһан нютагайнгаа басагые харахаяа ядашоод байһан заримашуул урагша хойшоо алхалнад. Тиигэһээр байтар Инна Степановагай харагдахадань, “ура!” болон бусад шанга үгэнүүдээр сугларагшад угтан абаба. Олон тоото аха дүүнэр, һоригшод, Правительствын гэшүүд баглаа сэсэгүүдые Иннэдэ барюулна.
Автор: Борис Балданов
Описание: Нютагайнгаа гоо дангина басагые хүн зон ехэ дулааханаар угтажа абаа.
Автор: Борис Балданов
Описание: Инна Степановае угтахаяа 100 гаран хүн аэропорт ерээ юм.
Нэн түрүүн, һайхан буряад ёһо заншалаар хүхэ номин хадагаар, сагаан эдеэгээр Олимпиин наадануудай мүнгэн медаль абаһан басагаяа арад зон угтаба. Суг хамта нүхэсэжэ, нэгэ газар гэшхэжэ ябаһан ород яһатанай заншалаар дабһатай хилээмэ барюулагдаа. Мэдээжэ Буряадай артист Дамба-Дугар Бочиктоев дангина басаганда соло дуудаба. “Байгал” театрай артистнар гоё гэгшын хатар гүйсэдхэбэ. Буряад хатарые Инна үнинэй хараагүй байгаа ёһотой.
Автор: Борис Балданов
Описание: Буряад ёһо заншалаар хүхэ номин хадагаар, сагаан эдеэгээр Олимпиин наадануудай мүнгэн медаль абаһан басагаяа арад зон угтаа.
Автор: Борис Балданов
Описание: "Байгал" театрай хатаршад Буряад ороноо дэлхэй дээрэ суурхуулһан Инна Степановае амаршалаа.
Уласхоорондын классай спортын мастер Геннадий Николаевич Манжуев амаршалгын үгэнүүд соогоо омогорхожо байһанаа мэдүүлээ. “Буряад орондомнай Олимпиин наадануудай мүнгэн медаль аяар 52 жэл соо ерээгүй байна. Тиимэһээ манай нютаг орондо Инна Степанова баяр асарба. Тиигэжэ манай Инна нютагаа бүхы дэлхэйгээр суурхуулжа, маанадые баярлуулба гээшэ”, - гээд, Геннадий Манжуев амаршалба. Олимпиин нааданууд хадаа арад зоной дунда һайндэр гэдэг. Харин тэндэ хабаадаһан тамиршад баатаршалга гаргана гээшэ. Энээниие амаршалгын үгэ хэлэгшэд онсо тэмдэглэһэн байна.
Буряад Уласай тамирай болон залуушуулай бодолгын яаманай сайд Баир Ангуров бүхы нютагаймнай зон Иннын харбахада зүрхөө даран һуугаа гэжэ хэлээ. “Энэ амжалта хадаа олон жэл соо хүлһөө гарган һорилго хэһэнэй сэн гээшэ. Манай олон тоото хүбүүд, басагад Иннын амжалта дээрэ үндэһэлэн, спортоор бэеэ һорижо, урагшаа дабшаха бэзэ гээд найдагдана”, - гэжэ Баир Ангуров тэмдэглээ.
Автор: Борис Балданов
Описание: Буряад Уласай тамирай болон залуушуулай бодолгын яаманай сайд Баир Ангуров Инна Степановае амаршалаа.
Автор: Борис Балданов
Описание: Уласхоорондын классай спортын мастер Гармажап Цыреновэй онсолһоор, Баргажан, Хурамхаанай дэбисхэр иимэ бэрхэ үхибүүдые тэнжээдэг юм.
Инна Степановагай дүтэ аха дүү, уласхоорондын классай спортын мастер Гармажап Цыренов Баргажан, Хурамхаанай дэбисхэр иимэ бэрхэ үхибүүдые түрэдэг юм гэжэ хэлээ. “Үшөө минии бага байхада, Даша Раднаевич Эрдыниев Баргажанай голдо һур харбалгын үндэһэ табиһан намтартай. Мүн тэрэнэй СССР-эй суглуулагдамал командын гэшүүн болоходонь, ехэ гайхаа бэлэйбди. Манай нютагай хүбүүнэй табиһан үндэһэн дээрэ энэ амжалта туйлагдабал даа”, - гээд Гармажап Цыренов сагай шэнжэнүүдые элирхэйлбэ.
Удаань Инна Степанова Ивалгын дасанда ошожо, Бандида Хамба лама Дамба Аюшеевые бараалхажа, хүндын сайда һууба. Бусадай хэлэһээр, бурхад, сахюусад дээгүүр гороолон хиисэжэ, Буряадаймнай тамиршадта Олимпиин алтан медаль асарха бэзэ. Иннын энэ медаль Токиодо абабалнь, хэншье гайхахагүй.
Автор: Борис БАЛДАНОВ
