​Гиирь үргэлгэ - Байгалай эрьедэ

Байгал далайн эрьедэ гиирь үргэлгөөр хэдэн томо мүрысөөн үнгэрһэн долон хоногой хугасаа соо эмхидхэгдэбэ. Нэн түрүүн, Дэлхэйн Кубогай табадахи шата болоо. Үшөө тиихэдэ дэлхэйн Гран при үнгэргэгдөө. Манай элитэ тамиршан, спортын габьяата мастер Сергей Леоновой шангуудта хүртэхын тула бүхэроссиин хэмжээнэй мүрысөөнөөр гиирь үргэлгын һайндэр түгэсөө.

Эдэ гурбан мүрысөөнүүд тамирай болон элүүржүүлгын “Энхалук” лагерь соо үнгэргэгдөө. Тэндэхи ажалшад болон РСДЮСШОР-ойхид аргагүй ехэ ажал хэжэ, мүрысөөе дээдэ гарай хэмжээндэ эмхидхээ гээд абаһаар лэ хэлэхэ шухала.

Иимэ уласхоорондын хэмжээнэй мүрысөөнүүд манай Буряадта дэмы болоогүй. Энээн тухай Оросой гиирь үргэлгын федерациин түрүүлэгшэ Игорь Солодов онсолон тэмдэглээ.

- Буряад Уласай тамиршад бүхы дэлхэй дээрэ түрэл нютагаа холо ойгуур суурхуулна. Тэдэнэй тоодо Оросой суглуулагдамал командын олон гэшүүд. Мүн тиихэдэ ганса Сергей Леонов гэжэ дуулахадаа, Буряад орон гээд лэ хүнэй һанаанда ороно, - гэжэ Игорь Солодов хэлээ һэн.

Байгал далайе бүхы дэлхэй дээрэ хүн зон мэдэдэг. Хэды тиигэбэшье, эндэ аяншалга хүгжөөхын тула эдэ мүрысөөнүүд тон ехэ үүргэ дүүргэнэ гээд һанагдана.

Мүнөө үедэ Арадай Хуралай депутат Сергей Леонов республика дотороо ганса гиирь үргэлгые нэбтэрүүлнэ бэшэ, мүн бусадшье спортын зүйлнүүдые дээшэнь үргэнэ гээшэ.

- Ургажа ябаа залуу үхибүүд иимэ мүрысөөнүүдые өөрын нюдөөр харахадаа, спортдо дурлажа, саашадаа тамир һайтай ябаха. Архи уужа, тамхи татажа ябахагүй гээд һанагдана, - гэжэ Сергей Леонов хөөрэнэ. – Азиин - Номгон далайн дэбисхэр дээрэ Буряад ороноо гиирь үргэлгые хүгжэлтын түб болгохо һанаатайбди. Энээндэ манай мүрысөөн туһалха ёһотой. Олоной хэлэһээр, эндэ аргагүй һайхан сэбэр агаар, үзэгдөөгүй гоё байгаали байна. Тиимэһээ удаа дараалан олон жэлнүүдтэ Байгал далайн эрьедэ Дэлхэйн Кубок болохо бэзэ гээд найдагдана.

Дэлхэйн Кубогай мүрысөөндэ зургаан гүрэнэй тамиршад хабаадалсаа. Чили, Кыргызстан, Монгол, Ирланди, Казахстан болон Оросой олон гиирь үргэгшэд ерээ. Тэдээн сооһоо Буряад Уласаймнай Андрей Рассадин, Сергей Любимский болон Василий Недорезов гэгшэд шалгараа, уласхоорондын классай мастернууд болоод ябаһанаа дахинаа гэршэлээ.

- Командна тоосоондо хабаадахаб гэжэ һанаагүйб. Харин командынгаа түлөө гараадхёоб. 71 дахин гиирь үргөөб. Харин нёдондо жэлэй 72 үргэлгэдөө хүрөөдүйб, - гэбэ Андрей Рассадин.

Яруунаһаа уг гарбалтай Сергей Любимский баһа чемпионой нэрэ зэргэдэ хүртөө. Тэрэнэй хэлэһээр, энэ мүрысөө харахаяа олон эдиршүүл ерээ. Тус мүрысөөн тэдэнэй дуратай спорт шэлэн абахадань туһа боложо үгэхэ. Аяар холын Чилиһээ ерэһэн Рене Мансила Рамирез байгаалиин гоё байһые тэмдэглээд, Оросой тамиршадтай тэмсэхэ аргагүй байна гэжэ хэлээ.

Иигээд лэ һонирхолтой мүрысөөнүүд түгэсэбэ. Нүгөө жэлдэ энэ сагта, энэл газартаа уулзахаяа хабаадагшад хөөрэлдэбэ.

Автор: Борис Балданов
Описание: Мүрысөөнүүдтэ илагшадые шагналгын үедэ