​Буряад арадта баяр асарһан Олимпиин нааданууд түгэсэбэ

Манай нютагта гарагай хоёрой үглөөгүүр болоод байхада, Рио-де-Жанейро хотодо 31 дүгээр Олимпиин наадануудай гал унтарба. 300 гаран комплект медальнууд эндэ өөрын эзэдтэй болоо. Харин нэгыень манай Буряад Уласта һур харбагша Инна Степанова асараа. Үшөө нэгэ буряад басаган Туяна Дашидоржиева баһа мүнгэн медаль абажа шадаа. Мүнөөдэрэйнгөө дугаарта Олимпиадын дүнгүүдые нэгэ багаханаар тодоруулха түсэбтэйбди. Энээние Соведүүдэй талмай дээрэ болоһон Инна Степановае угталгаһаа эхилэе.

Одоошье һур харбалгын түб баригдахань

Инна Степановагай гэртээ бусаһан үдэрэй үдэшэлэн Соведүүдэй талмай дээрэ баяр ёһололой наадан дэлгэгдэбэ. Олимпиадада шалгарһан басаган, намай иигэжэ угтаха гэжэ оройдоошье һанаагүйб гэжэ абаһаар лэ мэдүүлбэ.

Үнэхөөрөөшье, Буряад Уласта ехэ найр наадандал адли олон хүн Соведүүдэй талмай дээрэ сугларжа, Иннын баярые хубаалдаба. Бусадтай хамта засаг түрэ баригшад амаршалхаяа ерээ. Буряад Уласай Толгойлогшо-Правительствын Түрүүлэгшэ Вячеслав Наговицын тайзан дээрэ гаража, Инна Степановае амаршалхадаа, Орос гүрэнэй бюджедһээ манай Буряадта һур харбалгын түб барилгада мүнгэн һомологдохонь гэжэ мэдүүлбэ.

- Мүнөөдэр Оросой Правительстваһаа 200 миллион түхэриг үгтэхэ тухай хэлсээн баталагдаа. Манай бюджедһээ баһа 200 миллион түхэриг һомологдохо. Үшөө тиихэдэ һайн дураараа зон мүнгөө барилгада оруулалсаха бэзэ гээд найдагдана, - гэжэ Вячеслав Наговицын сурбалжалагшадта хэлэбэ. - һур харбалгын түб бариха газар бидэ олообди. Сэлэнгэ мүрэнэй эрье дээрэхи стадионой хажууда барихаар түсэблөөбди.

Энэ үдэшэ Инна Степановада 750 мянган түхэриг гүрэнэй тэдхэмжэ барюулагдаба. Бэрхэ басаганай һоригшо Гэрэлма Цыренжаповна Эрдынеева 375 мянган түхэриг абаха болоо.

Олон зониие суглуулһан хэмжээ ябуулгые Буряад Уласаймнай урдаа хараха артистнууд шэмэглээ.

Туяна Дашидоржиева нютагаа суурхуулаа

Августын 17-до Туяна Дашидоржиева Шэтэ хотодоо бусаба. Самоледой трапһаа улаан хибэс харгы дэлгэгдээ, хажуугаарнь сэрэгшэдэй жагсаал жэрыгээ.

Улаан-Үдэдэл адли үдэшэ түб талмай дээрэ концерт наадан болобо. Үбэр-Байгалай хизаарай засаг баригшад Туяные амаршалаа. Харин губернаторай уялгануудые дүүргэгшэ Наталья Жданова Олимпиадын мүнгэн медаль абагшые өөрын танхим соо угтан абаба.

- Манай Правительство һур харбалга хүгжөөлгэдэ өөрынгөө нүлөө ходо оруулжа байха. Манай Үбэр-Байгалда Туяна Дашидоржиевадал адли бэрхэ, эрмэлзэл ехэтэй хүбүүд, басагадай ургахаарнь урагшаа тэгүүлэн шамдахабди, - гэжэ Наталья Жданова хэлэбэ. – Һүүлэй үеын байдалаар Шэтэдэ һур харбалгын түб бариха тухай асуудал үшөө һайнаар шиидхэгдээгүй байна. Мүнөө хамсыгаа шуун хүдэлжэ, энээн тухай шиидхэбэри абахабди.

Үбэр-Байгалай хизаарай Правительство Туяна Дашидоржиевада 500 мянган түхэриг барюулба. Харин тэрээнэй һоригшо Светлана Жигжитова 250 мянган түхэригөөр урмашуулагдаха.

Оросой тамиршадай хүсэ шадал элирээ

Олимпиин наадануудай болохын урдахана уласхоорондын хэмжээндэ Оросой тамиршадые оруулхагүй тухай ябуулга болоһон байна. Хэды тиигэбэшье, Олимпиадын эхилхэеэ оройдоол хэдэн үдэр үлөөд байхада Оросой түлөөлэгшэдые оруулха болоо. Хэды тиигэбэшье, манай тамиршад тон үрэ дүн ехэтэйгээр Риодо хабаадаба.

Бүхы дээрэ Оросой тамиршад 19 алтан медаль абажа шадаа. Эгээл олон алтан медаль Оросой тамиршад сооһоо фехтованида хүртөө. Эндэ эрэшүүлэй болон эхэнэрнүүдэй суглуулагдамал команда шалгараа. Мүн тиихэдэ Яна Егорян болон Ирина Дериглазова гэгшэд Олимпиин чемпионууд болоһон байна.

Уран һайханай гимнастика, сүлөөтэ барилдаан, дзюдо, греко-римскэ барилдаан болон синхронно тамаралгада Оросой тамиршад хоёр-хоёр алтан медальнуудые абаһан юм.

Автор: Интернетһээ абтаһан фото-зураг
Описание: Олимпиин чемпион болоһон гимнастканууд

Дзюдо барилдаашад Беслан Мудранов болон Хасан Халмурзаев гэгшэд энэ Олимпиадада Россиин тамиршад сооһоо түрүүшын чемпионууд боложо элирээ.

Барилдаанай хибэс дээрэ Оросой тамиршад дүрбэн алтанда хүртөө. Греко-римскэ барилдаагаар Роман Власов болон Давит Чакветадзе хоёр гүрэнөө сурхуулаа. Мүн сүлөөтэ барилдаанда Абдулрашид Садулаев болон Сослан Рамонов гэгшэд түрүүлһэн байна.

Автор: Интернетһээ абтаһан фото-зураг
Описание: Сослан Рамонов

Уран һайханай гимнастикада болон синхронно тамаралгада Оросой тамиршад алтан медальнуудаа 20 гаран жэл алданагүй гэжэ мэдээжэ. Энэшье удаа, Оросой басагаднай шалгараа. Хубиин тоосоондо уран һайханай гимнаст Маргарита Мамун түрүүлжэ гараа. Үшөө тиихэдэ суглуулагдамал команданууд үшөө гурбан нэгэдэхи һууринуудые эзэлээ.

“Современное пятиборье” гэһэн спортын зүйлдэ Александр Лесун, спортын гимнаст Алия Мустафина, боксер Евгений Тищенко гэгшэд баһа алтан медальнуудые абаа.

Теннис наададаг Екатерина Макарова болон Елена Веснина хоёрой амжалта манай Буряад Уласта хабаатай гэбэл, алдуу болохогүй. Ушар гэхэдэ, Екатерина Макароватай нэгэ зал соо Ахын аймагһаа уг гарбалтай, эдир теннисист Дари Саханова һорилго хэдэг. Олимпиин чемпион болоһон аха нүхэрөө болон тэрэнэй һоригшые хани халуунаар амаршалһанаа Дари Саханова һаяхана социальна сүлжээ холбоон соо мэдүүлһэн байна.

Нааданай спортын зүйлнүүд сооһоо ганса гандбол наададаг басагаднай Оросой нэрэ солые абараа. Тэдэ хахад финалда һүүлшын Олимпиин наадануудай хоёр дахин чемпион байһан Норвегиин командые 38:37 гэһэн тоотойгоор илажа гараа. Мүн финалда Франциин командые 22:19 гэһэн тоотойгоор шүүжэ, Олимпиин наадануудай чемпионой нэрэ зэргэдэ хүртөө.

Автор: Интернетһээ абтаһан фото-зураг
Описание: Гандболоор алтан медаль асарһан басагаднай

Риодо Олимпиадын түгэсэхэдэ, 2020 оной Олимпиадын эзэн Токио хотодо туг дамжуулагдаа. Харин бидэ Паралимпиадын эхилхые хүлеэжэ байхабди. Манай Оросой команда тэндэ хабаадаха бэзэ гээд найдая.